गोव्यातील प्रसिद्ध दूधसागर धबधबा आता लवकरच पर्यटकांसाठी खुला करण्यात येणार आहे आणि दूधसागर धबधब्यापर्यंत जाणारी टॅक्सी सेवा सोमवारपासून सुरु होईल. दूधसागर पर्यटनसंदर्भात एक बैठक घेत मुख्यमंत्र्यांनी एकूण परिस्थितीचा आढावा घेतला. या बैठकीला गोवा पर्यटन महामंडळाचे अध्यक्ष आमदार गणेश गावकर तसेच वन विभाग आणि पर्यटन विभागाचे अधिकारी उपस्थित होते.

दूधसागर धबधब्यावर पर्यटकांची नेहमीच गर्दी असते आणि म्हणूनच सुरक्षिततेची काळजी घेण्यासाठी सर्व परिस्थितीचा आढावा घेऊन इथे टॅक्सी सुरु करण्याचा निर्णय घेण्यात आलाय. यंदा राज्यात बराच पाऊस झाला, आजही अनेक ठिकाणी पावसाळी वातावरण कायम आहे. पावसाच्या अतिरेकामुळे अनेक ठिकाणी रस्त्यांची दुर्व्यवस्था झालीये आणि यामुळे वाढणारे अपघात रोखण्यासाठी रस्त्यांवरचे खड्डे बुजवणे तसेच रस्त्यांच्या दुरुस्तीचे काम सुरु आहे. मुख्यमंत्र्यांनी या कामाचा आढावा घेतला असून वन अधिकाऱ्यांकडून देखील सुरक्षेच्या उपाययोजनांची माहिती देण्यात आलीये.

राज्यात पर्यटनाचा हंगाम सुरु होऊन देखील पाऊस अजूनही मागे फिरायचं नाव घेत नाही. यापूर्वी अनेकवेळा दूधसागर धबधब्यावर गेलेल्या पर्यटकांचा बुडून मृत्यू झाल्याच्या घटना घडल्या असल्याने सुरक्षिततेच्या दृष्टीने विशेष उपाययोजना आखण्याच्या सूचना बैठकीत देण्यात आल्या. पर्यटकांना माहिती देण्यासाठी मार्गदर्शक आहेतच मात्र या ठिकाणी अनेक सूचनाफलक लावण्यात यावेत तसेच संकेतांच्या स्थितीची पाहणी करण्याचे आदेश मुख्यमंत्र्यांनी दिलेत.