Drug Accused Arrested: राज्यातील वाढत्या ड्रग्जच्या घटना कमी करण्यासाठी गोवा पोलीस प्रशासन नेहमीच सतर्क असून ड्रग्ज माफियांवर आळा घालण्यासाठी ते सापळा रचत त्यांना ताब्यात घेत असतात. दरम्यान, सोमवारी रात्री उशिरा फातोर्डा पोलिसांनी छापा टाकून एकाला अटक केली आहे.

उत्तर प्रदेश येथील रामकृष्ण चौहान या संशयिताला पोलिसांनी अटक केली आहे. त्याच्याकडून 3 किलो गांजा जप्त केला. ज्याची आंतरराष्ट्रीय बाजारपेठेत 3 लाख रुपये किंमत आहे. रात्री उशिरा हा प्रकार घडल्याने यासंबंधी अधिक माहिती मिळू शकली नाही.

हा संशयित युपीमधून हा गांजा घेऊन आला होता. तो कोणाला ड्रग्स द्यायला आला होता त्याचा पोलिस तपास करत आहेत. रात्री उशीर त्याला फातोर्डा येथील बस स्थानकाजवळून ताब्यात घेण्यात आले आहे.

दरम्यान, वास्कोमध्ये टाकलेल्या छाप्यात एक किलो अवैध गांजा जप्त करण्यात आला असल्याची माहिती पोलिसांनी दिली आहे. वैधरीत्या ड्रग्ज पुरवठा होत असल्याची टीप पोलिसांना मिळाली होती. दरम्यान अमली पदार्थ विरोधी पथकाने सापळा रचत 23 वर्षीय रोहन सरोज याला ताब्यात घेतले आहे. रोहन हा मूळचा नवे वाड्डे येथील राहणारा असून त्याच्याकडून पोलिसांनी 1 लाख किमतीचा 1 किलो गांजा जप्त केला आहे.