पर्ये मतदारसंघातील विविध पंचायत क्षेत्रात विकासकामांना चालना देऊन आमदार डॉ. दिव्‍या राणे यांनी बरीच कामे मार्गी लावली आहेत. त्याचप्रमाणे भिरोंडा पंचायत क्षेत्रातून वाळपईकडे जाणाऱ्या रस्त्यावर असलेल्या जुन्या पुलांची पुनर्बांधणी करून नागरिकांना दिलासा दिला आहे. अवघ्या दोन वर्षांच्या काळात या पुलांचा प्रश्‍‍न मार्गी लावल्यामुळे या भागातील नागरिकांनी समाधान व्यक्त केले आहे.

भिरोंडा पंचायत क्षेत्रातून वाळपईकडे जाणारा रस्ता वाहतुकीसाठी खूपच महत्त्वाचा आहे. या रस्त्यावरून दररोज शेकडो वाहने ये-जा करत असतात. त्यात होंडा ते वाळपई व्हाया अडवई तर फोंडा ते वाळपई व्हाया पाडेली या दोन प्रमुख रस्त्यांचा समावेश आहे. परंतु या महत्त्वाच्या रस्त्यावर असलेले पूल फार जुने झाले होते. त्यामुळे त्या जागी नवीन पूल बांधण्याची गरज होती.

त्यानुसार भिंरोडा पंचायत मंडळाच्या वतीने आमदार डॉ. दिव्‍या राणे यांच्या सहकार्याने सार्वजनिक बांधकाम खात्याकडे प्रस्ताव पाठविण्यात आला होता. या प्रस्तावाचा पाठपुरावा आमदार राणे यांनी करून सदर रस्त्यावरील तीन पुलांची पुनर्बांधणी करण्याचे काम हाती घेऊन ते मार्गीही लावले. यामध्ये गावडेवाडा-पाडेली, सावर्शे या ठिकाणीच्या पुलांचा समावेश आहे, अशी माहिती भिंरोडा पंचायतीचे सरपंच उदयसिंह राणे यांनी दिली.