गोव्यात उद्या सकाळ पासून मतदानाला सुरुवात होत आहे. राज्यात सत्तेत असणाऱ्या भाजपला पराभूत करण्यासाठी विरोधक चांगलचे तयारीला लागले आहेत. राजकीय नेते प्रचारसभांच्या माध्यमातून एकमेकांवर आरोप-प्रत्यारोपांच्या फैरी झाडत आहेत. काही ठिकाणी मतदारांना पैसे वाटण्याच्या घटना समोर येत आहेत. याच पार्श्वभूमीवर आज गोव्यात (goa) झालेल्या प्रार्थना सभेत गोव्यातल्या चर्च मधून गोव्याच्या निवडणूकीत (Election) धर्मांध शक्ती तसेच मोफत गोष्टी वाटणाऱ्या पक्षाला मतदान करु नये असा संदेश गोव्यातील जनतेला चर्चने दिला आहे. तसंच पक्षांतर करणाऱ्यांना धडा शिकवायलाही सांगण्यात यावेळी सांगण्यात आलं आहे.

दरम्यान, याबाबत फादर बोलमॅक्स परेरा म्हणाले ”हा संदेश फक्त ख्रिश्चन मतदारांसाठी नाही. सर्वधर्मीय मतदारांनी या सूचनेकडे लक्ष द्यावं आणि मतदान करण्यासाठीची हे पत्र आहे. गोव्यात कायम सर्वधर्मसमभाव आहे. याला तडा जाण्यासाठी जे पक्ष प्रयत्न करतायत त्यांना नाकारा. तसंच आज प्रार्थनेत देखील आम्ही हे सांगितलं आहे. लोकांनी पर्यावरण विकास तसंच महत्वाचे जे प्रश्न आहेत त्यानुसार मतदान करायला हवं”

गोव्यात ख्रिश्चन मतदारांची संख्या मोठी आहे. त्यामुळे चर्च (Church) काय भुमिका घेतात याकडे सगळ्यांचं लक्ष असतं. त्यांच्याकडून शनिवारी याबाबतची भुमिका स्पष्ट करण्यात आली. त्यानंतर रविवारच्या प्रार्थनेत देखील याबाबत माहिती देण्यात आली. चर्च कडून प्रसिद्ध करण्यात आलेल्या पत्रात पक्षांतर करुन उमेदवार लोकांनी दिलेला कौल नाकारत आहेत असं म्हणलेलं आहे. या सगळ्यांना धडा शिकवायला देखील सांगण्यात आलं आहे. तसंच कृषी कायदे, अल्पसंख्यांकांवर झालेले हल्ले अशा सगळ्या बाबींचा विचार करायलाही सांगण्यात आलं आहे. राज्यात मोफत वस्तु आणि योजनांच्या माध्यमातून देखील काही पक्ष अमीष देत आहेत. त्यांनाही नाकारावं असं सांगण्यात आलं आहे.