पणजी: "आम्हाला घाटी - घाटी म्हणून हिणवू नका. विनाकारण लोकांचा शाप घेऊ नका", अशी विनंती कन्नड साहित्य परिषदेचे अध्यक्ष सिद्धन्ना मेटी यांनी गोवा रिव्हॉल्युशनरी पक्षाचे अध्यक्ष मनोज परब यांना केली. गोवा, कर्नाटक आणि महाराष्ट्र शेजारी राज्य असून, एकमेकांचे भाऊ आहेत, असेही मेटी म्हणाले.

वारंवार आम्हाला घाटी म्हणून हिणवू नका. आमची कपडे बघा कशी आहेत. आम्ही येथे पोटासाठी काम करतो, चोरी करत नाही. काही लोक गुन्हेगारी कृत्य करत असतील, ते नाकारता येत नाही. पण, देशात संविधान नाही का? असा सवाल मेटी यांनी उपस्थित केला.

"देशात संविधान आहे म्हणून आज कोणीही आमदार, खासदार होऊ शकते. आज मला तुमचे नाव घ्यायची लाज वाटते. रात्री ग्लास घेऊन तुम्ही बोलत असता मला कल्पना आहे. पण, तुमची सर्व कुंडली लोकांनी काढली आहे", असे मेटी म्हणाले.

"उत्तर भारतीयांनी संपूर्ण गोव्याची वाट लावलीय, जुवारी घोटाळा, याचा विचार करुन ते विषय हाती त्यांनी घ्यावे त्याला आमचाही पाठिंबा आहे. मोठे विषय लावून धरावेत, गरीबांच्या पाठिमागे लागून त्यांचा शाप त्यांनी घेऊ नये", असे मेटी माध्यमांशी बोलताना म्हणाले.

"सगळे लमाणी गुन्हेगार असत नाहीत, असं बोलण्याची गरज नाही. आमचेही राज्यात मतदान आहे. पुढे जिल्हा पंचायत जिंकू, आमदारही निवडून आणू. सर्वजण प्रेमाने भाऊ म्हणून राहुया", असे मेटी म्हणाले.

तुम्ही बेळगाव जाता आम्ही गोव्यात येतो. माझे ५३ वर्षे वय आहे माझा इथेच जन्म झाला, इथेच शिक्षण झाले. आमचे कपडे बघ आणि तुझे कपडे बघ, मी हात जोडून तुम्हाला विनंती करतो विनाकारण लोकांना हिणवून त्यांचा शाप घेऊ नका. मोठ्या मोठ्या लोकांच्या पाठिमागे लागा, तुमचे भविष्य उज्वल आहे, असे मेटी म्हणाले.