Vishwa Hindu Parishad Goa About Subhas Velingkar Statement on SFX

फोंडा: राज्यात सध्या चाललेल्या वेलिंगकर वादात बजरंग दलाशी विश्व हिंदू परिषदेला गोवू नका, कारण प्रत्येकाची मते स्वतंत्र असून गोव्यात धार्मिक तेढ निर्माण न करता सर्वधर्मीयांनी एकसंध राहून गोव्याचे वैभव जपावे, असे आवाहन विश्व हिंदू परिषदेचे राज्यमंत्री तथा माजी आमदार मोहन आमशेकर यांनी फोंड्यात घेतलेल्या पत्रकार परिषदेत केले.

यावेळी विहिंपचे उद्देश नाईक व राजेंद्र प्रभू उपस्थित होते. आमशेकर म्हणाले की, गोव्यात हिंदू आणि ख्रिश्चन बांधवांचे सख्य आहे. फार पूर्वीपासून एकमेकांच्या सणाला जाण्याची गोव्यात परंपरा आहे. पण एखाद्या विषयावरून गोव्यात अशांतता निर्माण करण्याचा आणि खूप छान चाललेल्या येथील विकासाला खीळ घालण्याचा व राजकीय लाभ उठवण्याचा प्रयत्न होत आहे, हा प्रकार खपवून घेतला जाणार नाही.

आमशेकर म्हणाले की, पोर्तुगीज काळात मूळ हिंदूंचे जबरदस्तीने धर्मांतर करण्यात आले अशा लोकांना पुन्हा हिंदुत्ववादी होण्यासाठी परिषदेची दारे नेहमीच खुली असतील. सुभाष वेलिंगकर जे बोलले ते त्यांचे स्वतःचे मत आहे आणि अशाप्रकारची मागणी यापूर्वी झाली आहे. शेवटी हा न्याय प्रविष्ट विषय असून गोव्याची शांतता अबाधित ठेवणे एवढेच गोमंतकीयांचे कर्तव्य आहे.