धीरज हरमलकर​

Green Fireworks : पणजी,ता.१६ (प्रतिनिधी): सण-उत्सवांत फटाके फोडून जगभरात आणि राज्यात होत असलेले वायू प्रदूषण लक्षात घेता आता कमी प्रदूषण करणाऱ्या हरित फटाक्यांची लोक निवड करत आहेत.

या फटाक्यांत वनस्पती आणि फुलांची पावडर असल्याचे विक्रेते सांगतात. नावीन्‍यपूर्ण फटाक्‍यांना यंदा फार मोठा प्रतिसाद मिळाला नसला तरी अनेक ग्राहकांनी कुतुहलापोटी त्‍याची खरेदी केली. भविष्‍यात हरित फटाक्‍यांना मागणी वाढेल, अशी चिन्‍हे आहेत.

दिवाळी सणाच्या दिवशी पारंपरिक दिवे लावून, धार्मिक विधी करून आणि फटाके फोडून दिवाळी सणाचा आनंद लुटला.यात हरित फटाक्यांचा मोठा वाटा होता.

दिवाळीत तेलाचे दिवे लावणे आणि फटाके फोडणे आणि रात्रीच्या वेळी त्यांच्या मित्र आणि कुटुंबातील सदस्यांसह फटाके फोडणे ही परंपरा आहे.

हवेतील वाढते प्रदूषण आणि प्रदूषणाच्या दुष्परिणामांबाबत तरुणांमध्ये निर्माण झालेली जागरूकता लक्षात घेता फटाक्यांच्या विक्रीत अलीकडच्या काळात घट झाली आहे.

फटाक्यांच्या स्टॉलधारक मनीषा देसाई यांनी सांगितले की, त्यांच्याकडे फटाके आणि ‘सीएसआयआर-निरी’द्वारे प्रमाणित केलेले फटाके आहेत. या फटाक्यांमध्ये हानिकारक रसायने नसतात, म्हणून ते घातक प्रदूषणकारी वायू उत्सर्जित करत नाहीत.

त्या पुढे म्हणाल्या की, आजची पिढी वायूप्रदूषणाबाबत अधिक जागरुक आहे आणि त्यामुळे दिवाळीसाठी कमी प्रदूषणकारी फटाके खरेदी करतात. पूर्वीची पिढी फटाक्यांची मोठी उत्पादने खरेदी करत होती. या नवीन फटाक्यांमध्ये वनस्पती आणि फुलांवर आधारित पावडर असते, जे रंग उत्सर्जित करतात.

यावर्षी आमच्याकडे विक्रीसाठी हरित फटाके आहेत. या उत्पादनांमध्ये वनस्पतीची पावडर असते. हे फटाके कमी धूर निर्माण करतात. यंदा लोकांचा प्रतिसाद चांगला असून दिवाळीसाठी लहान मुले,तरूणांनी मोठ्या प्रमाणात फटाक्यांची खरेदी केली. या फटाक्यांच्या किंमती गणेश चतुर्थी काळात जितक्या होत्या तितक्याच आहेत.

- पूनम नाईक,फटाक्यांच्या स्टॉल धारक