Goa News: ‘मेक अप विश फाऊंडेशन’तर्फे सिप्ला फाऊंडेशनच्या सहकार्याने कालापूर येथील रुग्णाश्रयात ‘रोझ डे’चे आयोजन करण्यात आले होते. यावेळी व्याधीग्रस्त मुलांचे मनोरंजन करून त्यांना आनंदात सहभागी करून घेण्यात आले.

जागतिक कर्करोग जागृती महिन्यानिमित्त या खास कार्यक्रमात पालकांसह मुलांनी भाग घेतला. आजारी मुलांमध्ये उत्साह आणि धैर्य टिकून राहावे, हा या कार्यक्रमाचा उद्देश होता. पालकांनी मुलांसह उपस्थितांची आपुलकी आणि स्नेह अनुभवला.

सामाजिक कार्यकर्त्या वैष्णवी शंखवाळकर यांनी मुलांना कागदी कात्रणांतून कोलाज करण्याची कला शिकवली. त्याचा मनमुराद आनंद मुलांनी लुटला.

सिप्ला कंपनीचे कर्मचारी आणि डॉक्टरांनी यावेळी मुलांना चार्ट पेपरवर कला साकारण्यासाठी सहकार्य केले. मुलांमधील कलात्मक गुण त्यांच्या कलाकृतीतून दिसून आले.

यावेळी डॉ. लोरेन डिसा, डॉ. अफिफा के.के., डॉ. समृद्धी मडकईकर तसेच रुग्णाश्रय साहाय्यता होम नर्सिंगच्या प्रमुख शांता म्हांबरे आणि सिप्ला कंपनीचे कर्मचारी उपस्थित होते.