Flight To Goa: जानेवारी 2023 पासून उत्तर गोव्यातील मोपा येथील मनोहर विमानतळ कार्यान्वित झाले. मनोहर विमानतळामुळे गोव्यात येणाऱ्या पर्यटकांच्या संख्येत लक्षणीय वाढ झाली आहे. नव्याने सुरू होणारी विमानसेवा देखील मोपा येथील विमानतळावरच उतरण्यासाठी पसंती देत आहे.

देशातील अनेक शहरातून मोपासाठी थेट विमानसेवा सुरू करण्यात आली आहे. त्यानंतर देशातील आणखी एका राज्यातील महत्वाच्या शहरातून गोव्यासाठी थेट विमानसेवा सुरू करण्याची घोषणा केली आहे.

मध्य प्रदेशची राजधानी भोपाळ आणि परिसरातील प्रवाशांना यापुढे गोव्यात जाण्यासाठी इंदूरला जाण्याची गरज भासणार नाही. गोव्याला जाणाऱ्या नागरिकांना भोपाळच्या राजा भोज विमानतळावरूनच गोव्यासाठी थेट विमानसेवा मिळणार आहे. इंडिगो 23 मे पासून भोपाळ-गोवा विमानसेवा (Bhopal - Goa Flight) सुरू करणार आहे. हे उड्डाण गोव्यात सुरू झालेल्या मोपा विमानतळावरून चालणार आहे.

सुरुवातीला मंगळवार, गुरुवार आणि शनिवारी दुपारी 12.10 वाजता उड्डाण करेल. इंडिगो एअरलाइन्सने विमानतळ व्यवस्थापनाला 23 मे पासून थेट उड्डाणे सुरू करण्याची सूचना केली आहे. भारतीय विमानतळ प्राधिकरणाने (AAI) यापूर्वी इंडिगो कंपनीला भोपाळ ते गोवा थेट विमानसेवा सुरू करण्याची परवानगी दिली होती. खरे तर गोव्याला विमानसेवा देण्याची मागणी अनेक दिवसांपासून होती. आता ते सुरू होत असल्याने प्रवाशांमध्ये उत्साहाचे वातावरण आहे.

इंडिगोचे भोपाळ ते गोवा थेट विमान आठवड्यातून तीन दिवस उड्डाण करणार आहे. मिळालेल्या माहितीनुसार, फ्लाइट मंगळवार, गुरुवार आणि शनिवारी रात्री 12.10 वाजता भोपाळ विमानतळावरून उड्डाण करेल. त्याचे प्रारंभिक भाडे 4,088 रुपये निश्चित करण्यात आले आहे. आतापर्यंत गोव्याला जाणाऱ्या प्रवाशांना इंदूरला जावे लागत होते.

सुरुवातीच्या टप्प्यात भोपाळ ते गोवा हे विमान आठवड्यातून तीन दिवस उड्डाण करेल. प्रवाशांची संख्या वाढल्यास आठवड्यातील सातही दिवस सेवा सुरू करण्यात येईल, असे विमानतळ संचालकांनी म्हटले आहे. इंडिगोच्या या सेवेमुळे गोव्यात जाणाऱ्या लोकांना फायदा होणार आहे.