Goa Election: आगामी लोकसभा निवडणुकीत भाजपचाच विजय होणार आहे. कारण भाजपने केलेले संकल्प, आश्‍वासने पूर्ण केली आहेत. मोदींची गॅरंटी ही शंभर टक्के असते. भाजप सरकारने सदैव जनतेचे हित जपले असून चौफेर विकास केला आहे. त्यामुळे आगामी लोकसभा निवडणुकीत भाजपचाच विजय होणार आहे,

असे मत आमदार दिगंबर कामत यांनी मडगावात भारत विकास संकल्प यात्रेनिमित्त आयोजित कार्यक्रमात व्यक्त केले.

मडगावात आज आमदार दिगंबर कामत, नगराध्यक्ष दामोदर शिरोडकर, मुख्याधिकारी गौरीश शंखवाळकर, सत्ताधारी नगरसेवक, नगरपालिका अधिकारी व भाजपच्या कार्यकर्त्यांनी भारत विकास संकल्प यात्रेचे स्वागत केले. याच संधीचा फायदा घेत आमदार कामत यांनी आगामी निवडणुकीसाठीच्या प्रचाराचा अप्रत्यक्षरीत्या नारळच फोडला.

सेवक, खेळाडूंचा गौरव

याप्रसंगी समाज सेवक, खेळाडू, नगरपालिका कर्मचाऱ्यांचा गौरव करण्यात आला. त्यात माजी शिक्षक रंजन नाईक, रामचंद्र ऊर्फ चंदू आचार्य, बुद्धिबळपटू दिया दिगंबर सावळ, हिंदू स्मशान भूमितील कर्मचारी आबा, ज्येष्ठ नर्स इंदू देसाई, आमांदा डिसोझा, सुनंदा जामुनी, देमव्वा जामुनी, भारत नाईक यांचा समावेश आहे. याप्रसंगी लाडली लक्ष्मी व विधवा पेन्शन योजनेच्या लाभार्थी अनुक्रमे रिया जामुनी व सुश्मिता नाईक यांनी आपले विचार व्यक्त केले.