Digambar Kamat: आजच्या शैक्षणिक पद्धतीत विज्ञान व तंत्रज्ञान महत्त्‍वाची भूमिका बजावत आहे. विज्ञान-तंत्रज्ञानाद्वारे नावीन्यपूर्ण कल्पना सुचत असतात. म्‍हणून आज त्‍यास जगात मोठी मागणी आहे. या क्षेत्रात जगातील इतर देशांच्या तुलनेत भारत खूप पुढे आहे. विद्यार्थ्यांनी विज्ञान-तंत्रज्ञानाची कास धरून आपले भवितव्‍य उज्ज्‍वल बनवावे, असे आवाहन मडगावचे आमदार दिगंबर कामत यांनी केले.

मठग्रामस्थ हिंदू सभेच्या श्री दामोदर विज्ञान उच्च माध्यमिक विद्यालयाने आयोजित केलेल्या दोन दिवसीय १७व्या विज्ञान प्रदर्शनाच्या समारोप सोहळ्यात कामत प्रमुख पाहुणे या नात्याने बोलत होते. हे प्रदर्शन भरविण्यास मडगावच्या आकाश इन्स्टिट्यूट व गोवा सरकारच्या विज्ञान व तंत्रज्ञान खात्याचे सहकार्य लाभले.

जी व्यक्ती परिस्थितीनुरुप योग्य काम करते, तीच या जगात तग धरू शकते. म्‍हणूनच विज्ञान व तंत्रज्ञानाची कास धरणे अत्यंत महत्वाचे आहे. या क्षेत्रात भारताला विकासाच्या दिशेने नेण्यासाठी पंतप्रधान नरेंद्र मोदी प्रयत्नशील आहेत, असे कामत म्हणाले.

घोगळ-मडगाव येथील श्री मारुती मंदिराच्या बाबू नायक सभागृहात 9 व 10 डिसेंबर असे दोन दिवस प्रदर्शन भरविण्यात आले. त्यात गोव्यातील 44 प्राथमिक शाळा व 15 उच्च माध्यमिक विद्यालयांतील 225 विद्यार्थ्यांनी व 120 शिक्षकांनी 150 प्रकल्प सादर केले. शिवाय दोन दिवसांत 13 शाळांतील हजारो विद्यार्थ्यांनी या प्रदर्शनाला भेट देऊन सादर केलेल्या प्रकल्पांची माहिती मिळवली.

समारोप सोहळ्यात मठग्रामस्थ हिंदू सभेचे अध्यक्ष पांडुरंग ऊर्फभाई नायक यानी सर्वांचे स्वागत केले. आकाश इन्स्टिट्यूटचे इम्रान खान तसेच प्रदर्शनात भाग घेतलेल्या काही विद्यार्थ्यांनी व शिक्षकांनी आपले विचार व्यक्त करताना मौलिक सूचना केल्या. याप्रसंगी गुजराती समाज ट्रस्टच्या विद्यार्थ्यांचा सर्जनशील प्रतिभा दाखवल्याबद्दल खास गौरव करण्यात आला.

व्यवस्थापन समितीच्‍या प्रतिनिधी रिमा कुंदे, प्रा. राजीव देसाई, पालक-शिक्षक संघाचे अध्यक्ष पराग रायकर, अनिल पै, विज्ञान प्रदर्शनाचे समन्वयक उद्धव काणेकर, विद्यार्थी प्रतिनिधी रोहन खोलकर व स्वयंम फळदेसाई यांची समारोप सोहळ्‍याला उपस्‍थिती होती.

सूत्रसंचालन चंद्रकांत शिंदे यांनी केले. पहिल्या दिवशी गोवा विद्यापीठाच्या भौतिकशास्त्राच्या प्राध्यापिका डॉ. रेश्मा राऊत देसाई प्रमुख पाहुण्या म्हणून उपस्थित होत्या.