डिचोली : टाळ-मृदंगाचा गजर आणि ‘ज्ञानबा तुकाराम, माऊली तुकाराम’ आदी श्री विठ्ठलनामाचा जयघोष करीत डिचोलीतून 130 विठ्ठलभक्त आज पायी वारी करीत पंढरपूरला जाण्यासाठी मार्गस्थ झाले. अपरांत सेवा प्रतिष्ठानच्या माऊली वारकरी मंडळाच्या बॅनरखाली आणि पायीवारीचे प्रणेते उदयबुवा फडके यांच्या नेतृत्वाखाली हे वारकरी आषाढी एकादशीनिमित्त चंद्रभागा तिरी भरणाऱ्या विठ्ठलभक्तांच्या मेळ्यात सहभागी होणार आहेत.

(Devotees left for Pandharpur from Bicholim for Ashadhi Ekadashi)

देवदेवतांचे आशीर्वाद घेतल्यानंतर पंढरीच्या विठूमाऊलीच्या दर्शनाची ओढ लागलेल्या विठ्ठलभक्त वारकऱ्यांनी लिंगाची कोंड-वाठादेव येथील तीर्थक्षेत्रावरून या पायी वारीला प्रारंभ केला. वाठादेवहून डिचोलीमार्गे वारकरी प्रवासासाठी निघाले आहेत. एका बाजूने पावसाळी वातावरण, त्यातच पायी वारीला सुरवात करताना आकाशात नभ दाटले होते. तरीदेखील विठ्ठलभक्त वारकऱ्यांमध्ये मात्र चैतन्यदायी वातावरण पसरले होते.

तेरा दिवस पायी प्रवास

या वारकऱ्यांमध्ये ज्येष्ठ विठ्ठलभक्तांसह महिला वारकऱ्यांचाही समावेश आहे. तेरा दिवस पायी चालत हे वारकरी पंढरपूर गाठणार आहेत. दुपारी आणि रात्री ठराविक ठिकाणी आश्रय घेत वारकरी मार्गक्रमण करणार आहेत. ‘कोविड’ महामारीमुळे गेली दोन वर्षे पायी वारी करता आली नव्हती. दोन वर्षांच्या खंडानंतर यंदा पायी वारी करण्याची संधी मिळाली आहे.

आमदारांकडून शुभेच्छा

पंढरपूरला निघालेल्या वारकऱ्यांना शुभेच्छा देण्यासाठी डिचोलीचे आमदार डॉ. चंद्रकांत शेट्ये लिंगाची कोंड-वाठादेव येथे उपस्थित राहिले होते. त्यांनी विठ्ठलभक्त वारकऱ्यांचे अभिनंदन करताना पायी वारी निर्विघ्नपणे पार पडो अशी शुभेच्छा दिली. यावेळी कारापूरचे माजी सरपंच लक्ष्मण गुरव तसेच गजानन डांगी उपस्थित होते. पायी वारीचे प्रस्थान होताना विठ्ठलभक्त वारकऱ्यांना निरोप देण्यासाठी त्यांच्या कुटुंबातील सदस्य आले होते.