Goa Congress भाजपने देशात व राज्यात फोडाफोडीचे राजकारण करून कटुता निर्माण केली. आज गोव्याचे भवितव्य तुमच्याच हातात असून मतभेद विसरून भाजपला सत्ताभ्रष्ट करणे गरजेचे आहे, असे आवाहन आमदार तथा विरोधी पक्षनेते युरी आलेमाव यांनी केले.

गोवा प्रदेश काँग्रेस पक्षाने राज्यात ‘हाथ से हाथ जोडो’ अभियान सुरू केले असून, मांद्रे विधानसभा क्षेत्र एक व त्या मतदारसंघातील बूथ एक केरी तेरेखोल पंचायत क्षेत्रात सुरू केले.

यावेळी प्रदेशाध्यक्ष अमित पाटकर, दक्षिण गोव्याचे खासदार फ्रान्सिस सार्दिन, आमदार ॲड. कार्लुस फेरेरा, रमाकांत खलप, बाबी बागकर, प्रदीप देसाई, गट अध्यक्ष नारायण रेडकर, रामचंद्र केरकर, तेरेखोलचे पंच गुदिन्हो उपस्थित होते.

आलेमाव म्हणाले, आम्ही म्हादईप्रश्नी राजीनामा देण्याची तयारी दाखवली. मात्र, मुख्यमंत्री डॉ. प्रमोद सावंत यांनी आमची मागणी धुडकावून लावली.

भाजप दादागिरी करीत असून विधानसभा अधिवेशन चार दिवसाचे केले, यावरून भाजप सरकार विरोधकांना घाबरत आहे, हे स्पष्ट होते. काँग्रेस पक्ष नेहमीच जनतेसाठी असून प्रत्येक प्रश्नांवर आम्ही आवाज उठवू. जनतेने आम्हाला साथ द्यावी.

भाजप म्हणजे 'भ्रष्ट जुमला पार्टी'

भाजप सरकारने त्रिपुरा व अन्य राज्यांचे निवडणुकांचे निकाल जाहीर झाल्यानंतर लगेच गॅस दरवाढ करून जनतेला किती किंमत असते, याची जाणीव करून दिली. भाजप म्हणजे 'भ्रष्ट जुमला पार्टी'असून त्यांनी गोवेकरांचा विश्वासघात केला आहे.

त्यांना सत्तेवर राहण्याचा नैतिक अधिकार नाही. बेरोजगार युवकांची फसवणूक केली आहे. त्यांच्याकडून लाखो रुपये स्वीकारून नोकऱ्या देत आहेत, असे पाटकर म्हणाले.