मडगाव: मडगाव ही ‘अ’ वर्ग नगरपालिका आहे. कागदोपत्री तिला तो दर्जा मिळालाही आहे. त्या वर्गानुसार तिच्याकडे अधिकारी वर्गही आहे. तसेच तिला निधीचीही समस्या नाही. चौथ्या व पाचव्या वित्त आयोगाकडून मिळालेला निधीही तिच्यापाशी आहे. असे असतानाही घन कचरा व्यवस्थापन आघाडीवर नगरपालिका पिछाडीवर गेली असून त्याची अधिकतम कामे स्वतः करण्याचे टाळून ती घनकचरा व्यवस्थापन महामंडळाकडे सोपविणे तिने पसंत केले आहे.

उदाहरणच द्यावयाचे झाले, तर सोनसोडोवर साचलेल्या अनेक वर्षांच्या कचरा राशींचे देता येईल. पालिकेला शक्य न झाल्यानेच त्यांच्या रेमिडिएशनचे काम याच महामंडळाकडे सोपविले गेले. तेवढ्याने भागत नाही, तर आता रोजचे दारोदार कचरा गोळा कामही खासगी ठेकेदाराकडे सोपविण्याचा विचार सुरू आहे. सोनसोडो प्रकल्पात तुंबलेल्या साधारण 14 हजार टन ओला कचरा तेथून बाहेर हटविण्यासाठी पालिकेने महामंडळाकडेच मदत मागितली आहे. त्याचप्रमाणे दैनंदिन कचरा तात्पुरता साळगाव प्रकल्पात नेण्यासाठी महामंडळाकडे परवानगी मागितली आहे. कारण तेथे अजून वीजपुरवठा सुरू झालेला नाही.