Fraud in Department Of Excise Goa : पेडणे अबकारी खात्यातील कोट्यवधी रुपयांच्या घोटाळ्याची सखोल चौकशी केली जाईल. त्यानंतर संबंधितांवर कडक कारवाई करून संपूर्ण पैसे वसूल केले जातील असे मुख्यमंत्री डॉ. प्रमोद सावंत यांनी सांगितले होते.

त्यानंतर प्रकरणातील संबंधित तिघांना निलंबित करण्यात आले होते. दरम्यान, पेडणे अबकारी खात्याचे अधिकारी व अबकारी आयुक्तांविरुध्द पेडणे पोलिसांत तक्रार दाखल करण्यात आली आहे.

मद्य विक्री परवान्याच्या नूतनीकरणातून व्यावसायिकांनी अबकारी खात्याला सुमारे दोन कोटी रुपयांचा चुना लावण्याचा प्रकार दै. ‘गोमन्तक’ने काही दिवसांपूर्वीच उघडकीस आणला होता.

पेडणे तालुक्यातील मद्यालयांकडून मद्य परवान्याचे नूतनीकरण न केल्याप्रकरणी अबकारी खात्याने त्यांना नोटिसा बजावल्या होत्या.

या नोटिसा मिळताच 76 मद्य परवानाधारकांनी पेडणे येथील अबकारी कार्यालय गाठून त्यांनी नूतनीकरणाचे शुल्क भरल्याच्या पावत्या सादर केल्यावर या घोटाळ्याचा पर्दाफाश झाला होता व खात्याने त्याची चौकशी सुरू केली होती.

या प्रकरणाची चौकशी करून खात्याने मुख्य सूत्रधार वरिष्ठ कारकून हरीश नाईक याच्यासह अबकारी निरीक्षक दुर्गेश नाईक व विभूती शेट्ये या तिघांना निलंबित करण्यात आले होते.

या प्रकरणात वरिष्ठ कारकून हरीश नाईक याने आर्थिक गैरव्यवहार केल्याची कबुली दिली. त्याच्याकडून गैरव्यवहारातील रक्कम वसूल करण्यात आली.

दरम्यान, वरिष्ठ कारकुनाने दिलेल्या जबानीनुसार या घोटाळ्यामध्ये पेडणे कार्यालयातील आणखी काहीजण तरी गुंतलेले आहेत असा संशय आहे. तसेच अबकारी खात्याने इतर कार्यालयातील आर्थिक व्यवहाराची माहिती मागविली आहे.