वास्को: संरक्षक नागरी कर्मचाऱ्यांच्या समस्या व स्थानिकांच्या तक्रारींविषयी भारतीय मजदूर संघ तसेच भारतीय प्रतिरक्षा मजदूर संघ, अखिल गोवा नौदल नागरी कर्मचारी संघाने संयुक्तरित्या वास्को येथील फ्लाईंग ऑफिसर कमांडिंग यांना निवेदन देऊन मागण्या मान्य करून समस्येचे निवारण करण्याची मागणी केली. यावेळी मुख्य गेटवर धरणे आंदोलनही करण्यात आले.

केंद्रीय कार्यकारिणी समिती सदस्य तसेच गोवा राज्य भारतीय मजदूर संघाचे सरचिटणीस के. प्रकाश यावेळी उपस्थित होते. त्यांनी माहिती देताना गोवा नौदल क्षेत्रातील कर्मचाऱ्‍यांच्या तक्रारी दीर्घकाळ प्रलंबित असून यात मुख्य सर्व संरक्षण नागरी कर्मचाऱ्यांना कॅशलेस वैद्यकीय सुविधा अजून उपलब्ध नसून ती उपलब्ध करून द्यावी, तसेच वास्कोजवळ नवीन वेलनेस सेंटर कर्मचाऱ्यांसाठी करावे अशी मागणी केली. गोव्यात कार्मिक संरक्षण उपकरणे जारी केले गेले नाही किंवा कोणताही गणवेश भत्ता जारी केला गेला नाही. वरुणापुरी येथे संरक्षण नौदल नागरी निवासस्थानांची कमतरता आहे.

गोव्यातील अंतर्गत हॉस्पिटलचे पॅनेल न केल्यामुळे, वैद्यकीय प्रतिपूर्तीचे दावे नागरी कर्मचाऱ्यांकडून केले जात आहेत.प्रलंबित मागण्यांवर कोणतीही कार्यवाही न केल्याने तक्रारी निदर्शनास आणून दिल्या आहेत. भागधारकांशी संवादाच्या माध्यमातून द्विपक्षीय चर्चेद्वारे समस्या सोडवाव्यात अशी मागणी गोवा राज्य भारतीय मजदूर संघाचे सरचिटणीस के. प्रकाश यांनी केली.