Kokan Railway Flyover Bridge Margao Navelim

सासष्टी: मडगावमधील कोकण रेल्वे उड्डाणपूल हा मडगाव व नावेली यांना जोडणारा महत्त्वाचा दुवा आहे. काणकोण, कारवार व पुढे जाणारी वाहने याच उड्डाणपुलावरून जात असतात. शिवाय स्थानिकांच्या वाहनांची वर्दळ या पुलावरून होत असते.

मात्र, गेल्या दोन-तीन महिन्यांत पडत असलेल्या पावसामुळे उड्डाणपुलावरील रस्ता खड्डेमय झाला असून केवळ खड्डे बुजविण्यापुरती स्थिती या रस्त्याची नसून उड्डाणपुलावरील संपूर्ण रस्त्यावर नव्याने हॉटमिक्सिंग करण्याची गरज आहे, अशी मागणी लोक करू लागले आहेत.

एक-दोन वर्षांपूर्वी या उड्डाणपुलावरील रस्त्याची दुरुस्ती करण्यात आली होती व त्यासाठी वाहतुकीवरही मर्यादा घालण्यात आल्या होत्या. मात्र, या पावसामुळे उड्डाणपुलावरील रस्ता परत खराब झाला आहे. वाहनांना खासकरून दुचाकीस्वारांना त्याचा जास्त फटका बसत आहे.

या उड्डाणपुलाची नियमित देखभाल होत नाही, अशी लोकांची तक्रार आहे. ज्या कंत्राटदाराने या रस्त्याची दुरुस्ती केली त्याची चौकशी सरकारने करावी, अशी मागणीही लोक करू लागले आहेत. या पुलावरील रस्त्याची स्थिती दिवसेंदिवस खराब होत चालली आहे व तत्काळ दुरुस्तीची आवश्यकता असल्याचे एका स्थानिकाने सांगितले.