डिचोली: ग्रामीण विकास यंत्रणेतर्फे ग्रामसमृद्धी योजनेअंतर्गत 31 लाख रुपये खर्चून पिळगाव पंचायत क्षेत्रातील सारमानस येथे बांधलेल्या स्मशानभूमी प्रकल्पाचे लोकार्पण करण्यात आले. निमंत्रित करूनही स्मशानभूमीच्या लोकार्पण सोहळ्याला मंत्री गोविंद गावडे आणि आमदार प्रेमेंद्र शेट उपस्थित न राहिल्याने अखेर त्यांच्या अनुपस्थितीत हा सोहळा पार पडला.

काल बुधवारी आयोजित या सोहळ्याला ‘सेझा''चे वरिष्ठ अधिकारी जोसेफ कुयल्हो यांच्या हस्ते प्रकल्पाचे लोकार्पण करण्यात आले. यावेळी सेसाचे व्यवस्थापक संतोष मांद्रेकर, स्थानिक पंच अनिल नाईक आणि स्वप्‍निल फडते, ज्येष्ठ नागरिक गजानन (नाना) वरगावकर, अनिल चव्हाण, पांडुरंग चव्हाण, लक्ष्मण सावंत आदी उपस्थित होते. मांद्रेकर, फडते यांची भाषणे झाले. सुरूवातीस अन्य मान्यवरांच्या उपस्थितीत कुयल्हो यांनी फित कापून नामफलकाचे अनावरण केले. अनिल नाईक यांनी प्रास्ताविकपर भाषणात स्मशानभूमीसाठी ५०० चौरस मीटर जागा उपलब्ध करून दिल्याबद्दल सेसा कंपनीला धन्यवाद दिले. सूत्रसंचालन काशिनाथ मयेकर यांनी केले.