Utpal Parrikar: विधानसभा निवडणुकीच्या पार्श्वभूमीवर गोव्यात सर्व राजकीय पक्षांतर्फ आपल्या उमेदवारांची यादी जाहीर होत आहे. माजी मुख्यमंत्री स्व. मनोहर पर्रीकर यांचे पुत्र उत्पल पर्रीकर (Utpal Parrikar) हे भाजपच्या उमेदवारीवरून पणजीतून लढण्यास उत्सुक होते. पण पणजीमध्ये त्यांचा विजय होणे असंभव आहे, असे पक्षश्रेष्ठींचे मत असल्यामुळे त्यांना भाजपची (BJP) उमेदवारी नाकारण्यात आली होती.

यादरम्यान त्यांना अनेक पक्षांकडून पाठिंबा देण्याचे प्रस्ताव मिळाले होते. पण या सर्व ऑफर्सना झुगारून त्यांनी आज घेतलेल्या पत्रकार परिषदेत पणजीतून अपक्ष पद्धतीने निवडणूक लढण्याचे जाहीर केले आहे. त्यांच्या या निर्णयामागचे कारण विचारले असता ते म्हणाले, 'ज्या पक्षात माझ्या वडिलांनी कार्य केले आहे, त्याच पक्षातून विधानसभा निवडणूक (Goa Assembly Elections 2022) लढवण्याची माझी इच्छा होती. पण पक्षाने उमेदवारी नाकारल्यामुळे ती इच्छा पूर्ण होऊ शकत नाही. परंतु तरीदेखील गोव्यातील जनतेसाठी मला काम करायचे आहे. कारण मला गोव्यातील सर्वसामान्य जनतेची चिंता आहे. म्हणून मी ही निवडणूक अपक्ष लढवण्याचे ठरवले आहे. माझा हा निर्णय गोवेकरांसाठी आणि त्यांच्याच बाजूने असणार आहे. त्यामुळे आता सर्व काही जनतेच्याच हातात आहे.'

उत्पल पर्रीकरांनी आता जाहीररित्या स्वतंत्रपणे निवडणूक लढवण्याचे ठरवल्याने गोव्याच्या राजकीय वर्तुळात चर्चांना उधाण आले आहे. त्यांच्या या निर्णयाचे जनतेकडून स्वागत करण्यात येत आहे. आता भाजपच्या नेत्यांची यावर नेमकी काय प्रतिक्रिया असणार, याकडे सर्वांचे लक्ष लागून राहिले आहे.