मनोदय फडते

कुडचडे :

काले ग्रामपंचायत क्षेत्रातील पिल्लगाळ - दुधाळ येथील चिरेखाणीत पडून ४९ वर्षीय प्रभाकर राम गावकर यांचे निधन झाल्याची घटना उघडकीस आली. ही व्‍यक्ती शनिवारी सकाळपासून बेपत्ता  झाली होती आज पाण्यात तरंगताना त्याचा मृतदेह मिळाला. कुडचडे पोलिसांनी तो ताब्यात घेऊन उत्तरीय तपासणीसाठी हॉस्पिसियोत पाठवून दिला आहे. 
पिल्लंगाळ - दुधाळ काले भागात पूर्वी मोठ्या प्रमाणात चिरे उत्खनन केले जात होते. कालांतराने स्थानिकांनी विरोध केल्यामुळे चिरेखाणी बंद केल्‍या होत्‍या. पण, चारही बाजूंनी उघड्या सोडलेल्या चिरेखाणीत पावसाचे पाणी साचून तळ्याचे स्वरूप प्राप्त होत असते. त्‍यापैकी एका बंद असलेल्या चिरेखाणीत पडून प्रभाकर गावकर यांचा मृत्यू झाला असावा, असा अंदाज नागरिकांनी व्यक्त केला आहे. चिरे काढून तशाच सोडून दिलेल्या चिरेखाणींच्‍या सभोवताली कुंपण घालण्याची मागणी स्थानिकांनी केली आहे. 
सांगे केपे धारबांदोडा भागात मोठ्या प्रमाणात बेकायदेशीर चिरेखाणी आहेत. त्‍या आजही सुरू आहेत. त्यांच्यावर कारवाई करण्याची व पावसाळ्यात तशाचा संरक्षणाविना सोडून दिलेल्या खाणीत पावसाचे पाणी भरून जंगली जनावरे, पाळीव प्राणी आणि माणूसही बुडून मृत्यू होत असल्याची माहिती दक्षिण गोवा जिल्हाधिकारी अजित रॉय यांना युवासेनेतर्फे देऊन खाणी सभोवताली कुंपण घालावे किंवा खाणी बुजविण्यात याव्यात, अशी मागणी केली होती. मात्र, प्रशासनाने चिरे खाणींवर कोणतीही कारवाई केली नसल्‍याने नाराजी व्‍यक्त करण्‍यात येत आहे.