गोवा: गोव्यात सध्या पर्यटन हंगाम सुरु आहे अशातच उत्तर आणि दक्षिण गोव्यातून सोमवारी (दि. 4 नोव्हेंबर) रोजी दोन रशियन नागरिकांच्या मृत्यूचा धक्कादायक खुलासा झाला. डेनिस डेटकोव्ह (वय, 47) नावाच्या एका इसमाचा मृतदेह गेस्ट हाऊसमध्ये सापडला.

हा रशियन व्यक्ती शनिवारी गोव्यात आला होता आणि त्याची तब्येत खराब असल्याचे कारण सांगून काही तरी औषधं घेत होता. पूर्ण दिवस डेनिस डेटकोव्हने दरवाजा न उघडल्याने घर मालकिणीला संशय आला आणि तिने दरवाजा जोरजोरात वाजवायला सुरुवात केली, मात्र तरीही आतून काहीच प्रतिसाद आला नाही.

ही घटना काहीशी संशयास्पद वाटल्याने तिने त्वरित काणकोण पोलिसांशी संपर्क साधला. पोलीस घटनास्थळी दाखल झाल्यानंतर त्यांना डेनिस डेटकोव्ह मृत अवस्थेत सापडला. सामुदायिक आरोग्य केंद्राच्या अधिकाऱ्यांकडून त्याला मृत घोषित करण्यात आले आणि सध्या त्याचे मृत शरीर दक्षिण गोव्यातील जिल्हा रुग्णालयामध्ये ठेवण्यात आले आहे, पुढे याची शवचिकित्सा केली जाईल.

सोमवारीच उत्तर गोव्यातून देखील असाच एक प्रसंग उघडकीस आला. तेमुर त्सेरबाएव (वय,44) नावाच्या इसमाचा मृतदेह त्याच्याच शिवोलीतील भाड्याच्या घरात सापडला.

त्याच्या पत्नीने हणजूण पोलिसांना दिलेल्या माहितीनुसार तो दारूच्या आहारी गेला होता आणि त्याच्यावर उपचार सुरु होते. पोलिसांच्या म्हणण्यानुसार तेमुर त्सेरबाएवच्या पत्नी व मुलीला बाहेरून परतल्यानंतर तो मृतावस्थेत सापडला. या घटनेचा सखोल तपास केला जाईल अशी माहिती गोवा पोलिसांनी दिली आहे.