कळंगुट : सिकेरी समुद्रात शुक्रवारी बेपत्ता झालेला केरळचा विद्यार्थी निर्मल साजू याचा मृतदेह आज सकाळी सापडला. केरळ येथील अभियांत्रिकी महाविद्यालयातील विद्यार्थ्यांचा एक गट शैक्षणिक सहलीसाठी गोव्यात आला असता शुक्रवारी संध्याकाळी त्यांच्यापैकी निर्मल साजू (वय 21) हा विद्यार्थी सिकेरी येथील समुद्रात सेल्फी घेण्याच्या प्रयत्नात बुडाला होता.

स्थानिक पोलिस, जीवरक्षक दल तसेच अग्निशमन दलाकडून रात्री उशिरापर्यंत त्याचा शोध घेण्याचे सत्र सुरू होते. मात्र, वादळी वारा आणि पाऊस असल्याने शोध मोहीम काल मध्येच सोडून देण्यात आली होती. शनिवारी सकाळी शोध मोहीम पुन्हा सुरू केली असता सेल्फी घेण्याच्या प्रयत्नात जेथे निर्मल साजू याचा तोल जाऊन तो बुडाला होता त्याच ठिकाणी त्याचा मृतदेह सापडला.

कळंगुट पोलिसांनी मृतदेह बांबोळी येथील गोवा वैद्यकीय महाविद्यालय इस्पितळात वैद्यकीय तपासणीसाठी पाठवून दिला असून संध्याकाळी उशिरापर्यंत तो त्याच्या कुटुंबीयांच्या स्वाधीन करण्यात येणार असल्याचे पोलिस निरीक्षक लक्षी आमोणकर यांनी सांगितले.