पणजी: भाजपचे प्रदेशाध्यक्ष दामू नाईक यांनी आज दिल्लीत भाजपचे राष्ट्रीय सरचिटणीस (संघटन) बी. एल. संतोष यांची भेट घेतली. त्यांनी दोन महिन्यांत केलेल्या संघटनात्मक कामाचा तसेच गोवा व सरकार याविषयीचे अहवाल त्यांना सादर केले.

पंतप्रधान नरेंद्र मोदी यांच्या निमंत्रणावरून दामू हे काल दिल्लीला गेले होते. संसद भवनात त्यांनी पंतप्रधानांची भेट घेतली. या भेटीबाबत दामू यांनी सांगितले, की प्रदेशाध्यक्ष झाल्यानंतर केलेली कामे आणि पक्षाची सरकारकडून असलेली अपेक्षा या विषयी या भेटीत सविस्तर चर्चा करण्याची संधी मिळाली.

त्यानी केलेले मार्गदर्शन पक्षाचे राज्यात काम पुढे नेण्यासाठी निश्चितच उपयोगी ठरेल. मतांची टक्केवारी ३६ टक्क्यांवरून ५० टक्के करण्याचे लक्ष्यही या भेटीदरम्यान निश्चित करण्यात आले. दामू यांनी आज संतोष यांच्याशी चर्चा केली. राज्यात संतोष आले असताना दामू यांनी त्यांच्याकडे अहवाल सादर केला होता.

त्या अनुषंगानेही चर्चा झाली. संघटनात्मक बाबींवर चर्चा झाल्याचे त्यानी नमूद केले. मंत्रिमंडळ फेरबदल किंवा कोणत्या मंत्र्याच्या कामगिरीबाबत या भेटीदरम्यान चर्चा झाली का याविषयी वारंवार विचारणा करूनही दामू यांनी काहीही सांगण्यास नकार दिला. दामू यांनी काल रात्री व आज दुपारी पक्षाच्या अन्य महत्वाच्या नेत्यांशी चर्चा केली. आज सायंकाळी सहा वाजता राज्यात पोचल्यावर ते तडक पक्षाच्या मेळाव्यासाठी कळंगुट येथे रवाना झाले.