पणजी: मध्यरात्री सुमारे तीन वाजता झालेल्‍या वादळी पावसामुळे राज्‍यातील कृषी उत्पादनांचे मोठे नुकसान झाले. अनेक ठिकाणची झाडे उन्‍मळून पडली तर बहुतांश ठिकाणचे कापणीला आलेले भाजी पीक वाहून गेले.

ताळगाव येथील वृद्ध शेतकरी चालू मुरगावकर यांनी याबाबत बोलताना सांगितले की, आम्‍ही येथे पालक, भेंडी, मिरजी, चिटकी आदींचे पीक घेतले होते. येत्‍या दोन दिवसांत ही भाजी काढणार होतो. पण अचानकपणे झालेल्‍या मुसळधार पावसामुळे आमचे सर्व पीक पाण्याखाली गेले. तसेच येथील तरुण शेतकरी रोहिदास गावस यांनी सांगितले की, आम्हीही भाजीचेच पीक घेतले होते. पण अवकाळी पावसामुळे माझे अंदाजे सव्वा लाखांचे नुकसान झाले आहे.

आजच्‍या पावसाने आमचे मोठे नुकसान केले. इतके नुकसान होऊनही सरकार पातळीवर एकाही यंत्रणेने याची दखल घेतली नसल्‍याचे श्री. मुरगावकर यांनी सांगितले. पंचायत असो किंवा स्‍थानिक आमदार आमची साधी चौकशीही करायला आलेले नाहीत. सदरचे पीक आम्‍ही स्‍वखर्चातून केले होते. यासाठी सरकारने किंवा पंचायतीने आम्‍हाला काहीही मदत केलेली नाही, असे श्री. गावस यांनी यावेळी सांगितले. ताळगाव परिसरातील संपूर्ण शेत पिकाचे मोठ्या प्रमाणात नुकसान झाले असून सरकारने याची दखल घ्यावी, असे आवाहन श्री. मुरगावकर यांनी यावेळी केले.

विजेचा लपंडाव

रविवारी मध्यरात्री संपूर्ण राज्‍यात वादळी पाऊस झाला. विजांची कडकडाट आणि वादळी वारा यामुळे राजधानी पणजीत काही ठिकाणी झाडांची पडझड झाली. सखल भागात पाणी साठले. अनेक ठिकाणी वीज गूल झाल्‍याने उकाड्याने हैराण झालेल्‍या नागरिकांना अधिकच त्रास सहन करावा लागला.