पणजी: दक्षिण गोव्यातील दाबोळी आंतरराष्ट्रीय विमानतळ घोस्ट विमानतळ होणार नाही. सरकार याबाबत जागृक असून, विमानतळ भविष्यात देखील सुरुच राहिल, असे मुख्यमंत्री डॉ. प्रमोद सावंत यांनी सभागृहात सांगितले. विरोधी पक्षनेते युरी आलेमाव यांच्यासह विरोधी बाकावरील आमदारांनी मांडलेल्या लक्षवेधीवर मुख्यमंत्री सावंत यांनी उत्तर दिले.

विरोधी पक्षनेते युरी आलेमाव यांनी दाबोळी विमानतळाबाबत बोलताना, येत्या काही दिवसात दाबोळी घोस्ट विमानतळ होण्याची भीती व्यक्त केली. दाबोळीवरुन गेल्याकाही दिवसांत कतार, इंडिगो, ओमान, एअरफ्लोट, एअर अरेबिया यासारख्या फ्लाईट्स मोपावर स्थलांतरीत झाल्याचे आलेमाव यांनी सांगितले.

यासह विरियातो यांनी संसदेत दिलेल्या उत्तराचा भाग देखील आलेमाव यांनी यावेळी वाचून दाखवत, केंद्रीय मंत्रायल देखील दाबोळीवरुन स्थलांतर होणार फ्लाईट्सबाबत हात झटकत असल्याचे म्हटले.

याशिवाय आमदार विजय सरदेसाई, एल्टन डिकॉस्ता, आलेक्स रेजिनाल्ड लॉरेन्स, नीलेश काब्राल यांच्यासह दाबोळीबाबत मत मांडले.

मुख्यमंत्री डॉ. प्रमोद सावंत यांनी याबाबत उत्तर देताना दाबोळी घोस्ट विमानतळ होणार नाही, अशी ग्वाही दिली. सरकार दाबोळी विमानतळाबाबत जागृक असून, ते कोणत्याही परिस्थितीत बंद होणार नाही, असे त्यांनी आश्वसत केले.

सकाळी वेळेच्या कारणामुळे दाबोळीवरुन थोड्य़ा फ्लाईट मोपावर डायव्हर्ट झाल्या असतील, असेही सावंत म्हणाले. दाबोळीवरील युझर डेव्हलपमेंट फी आणि पार्किंग फी कमी करण्यासाठी केंद्राकडे मागणी करणार असल्याचे सावंत म्हणाले.

व्हिसा ऑन अरायव्हलसाठी परराष्ट्र खात्याकडे चर्चा करण्याचे आश्वासन सावंत यांनी यावेळी दिले. येत्या काळात कोल्हापूर आणि बेळगाव सारख्या ठिकाणांवरुन देखील कनेक्टीव्हिटी वाढणार असल्याचे सावंत म्हणाले.