Cutbona Jetty Cholera Cases

सासष्टी: मुख्यमंत्र्यांनी कुटबण जेटी पाहिली व ते हैराण झाले. कुटबण जेटी संदर्भात मुख्यमंत्र्यांनी काही सूचना केल्या आहेत व या सूचना अंमलात आणायची जबाबदारी आपल्यावर टाकली आहे. सासष्टीतील एकमेव मंत्री तसेच आपल्याला कुटबण जेटी जवळ असल्याने मुख्यमंत्र्यांनी आपल्यावर ही जबाबदारी टाकली असावी.

सर्व संबंधितांची बैठक बोलावून जेटीवरील उपाययोजनांचा आढावा घेतला व पुन्हा एकदा कुटबण जेटीवर जाऊन प्रत्यक्ष पहाणी व सर्वेक्षण केले जाईल, असे पर्यावरण मंत्री आलेक्स सिक्वेरा यांनी पत्रकारांना सांगितले.

ही जबाबदारी पार पाडताना संबंधितांच्या अनेक बैठका घ्याव्या लागतात व त्यासाठी या दिवसांत आपण अनेक बैठका घेत आहे. वस्तुस्थिती पाहिली तर जे काम व्हायला पाहिजे ते गतीने होत नाही. तरी बोट मालक व मच्छिमारांनी सफाईचे काम स्वतःहून सुरू केले आहे ही चांगली गोष्ट आहे. असेही सिक्वेरा यानी सांगितले. कॉलरासंबंधी सध्या परिस्थिती नियंत्रणात आहे. दक्षिण गोवा जिल्हा इस्पितळात केवळ एक व ‘गोमेकॉ’त सहा कॉलरा रुग्ण उपचार घेताहेत,असेही ते म्हणाले.

भाजप सदस्य वाढीचा प्रयत्न!

नुवे मतदारसंघातील भाजप सदस्य नोंदणी मोहिमेसंदर्भात बोलताना सिक्वेरा यांनी सांगितले की, आपण अमुक इतकेच सदस्य करणार, असे कोणतेही बंधन घातलेले नाही. ज्यांना इच्छा आहे त्यांनी भाजपचे सदस्य व्हावे. मात्र जास्तीत जास्त सदस्य नोंदणी करण्याचा आपला प्रयत्न आहे, अशी पुस्तीही त्यांनी जोडली.