मडगाव: नव्या सरकारच्या सत्तारोहणाची तारीख ठरलेली असली तरी आता एसजीपीडीए म्हणजेच दक्षिण गोवा नियोजन व विकास प्राधिकरणाचे अध्यक्षपद कुणाला मिळणार, या चर्चेला दक्षिण गोव्यात व विशेषत: मडगावात जोर आला आहे. या संस्थेचा इतिहासच असा हे की आजवर बहुतेकदा राजकारणीच अध्यक्षपदी आलेले आहेत. एक दोन वेळा त्याला अपवाद असला तरी बहुतेकदा राजकीय नियुक्त्या झालेल्या आहेत.

या प्रधिकरणावर मडगाव व फोंडा शहराच्या विकास व नियोजनाची जबाबदारी आहे. पण बहुतेकदा या दोन्ही शहरांबाहेरील व्यक्ती वा राजकारण्यांनीच तिचे नेतृत्व केलेले आहे. त्यामुळेच या दोन्ही शहरांच्या नियोजन वा आखणीकडे आजवर दुर्लक्ष झालेले आहे व त्यातून अनेक समस्या निर्माण झालेल्या आहेत. या प्राधिकरणावर मडगाव, फातोर्डा व फोंडा आमदार सदस्य असतात.