Dangerous Saleri Bridge

आगोंद: आगोंद व खोला या दोन गावांना जोडणाऱ्या साळेरी येथील मुख्य रस्त्यावरील पुलाच्या खालील भागातील सिमेंट पडून लोखंडी गज बाहेर पडले आहेत. त्‍यामुळे या ठिकाणी कधीही मोठी दुर्घटना घडण्याची भीती ग्रामस्थांनी व्यक्त केली असून प्रशासनाने तातडीने उपाययोजना करण्याची मागणी केली आहे.

माजी मुख्यमंत्री स्व. शशिकला काकोडकर यांच्या हस्ते १९७५ साली या पुलाचे उद्‍घाटन करण्यात आले होते. त्यानंतर साधारणपणे १३ वर्षांपूर्वी माजी आमदार विजय पै खोत यांच्या कार्यकाळात या पुलाची दुरुस्ती करण्यात आली होती, असे स्थानिक समाज कार्यकर्ते सुनील पागी यासंबंधी सांगितले.

या पुलावरून सतत वाहनांची वर्दळ चालू असते. काणकोण ते मडगाव महामार्गावर काही अपघात किंवा अन्य कारणांमुळे वाहतूक बंद झाल्यावर या मार्गाने वाहतूक वळविली जाते. मोठी मालवाहू वाहने‌ या पुलावरूनच ये जा करत असतात.

सध्या या पुलाला मोठे तडे आलेले स्पष्ट दिसत असून या पुलाची तातडीने दुरुस्ती आवश्यक बनली आहे, असे विनोद फळदेसाई यांनी सांगितले.

अनुचित घटना घडण्यापूर्वीच या पुलाच्या सद्यस्थितीचे तज्ञांकडून निरिक्षण करून त्यावर उपाययोजना करणे‌ आवश्यक आहे, असे आगोंद स्पोर्ट्स क्लबचे माजी अध्यक्ष व अखिल गोमंतक मराठा समाज काणकोण शाखेचे अध्यक्ष किरण नाईक गावकर यांनी म्हटले आहे.