मॉन्सून उंबरठ्यावर आलाय, तरी शापोरा नदीवरील साळ बंधाऱ्यावर अजूनही पर्यटकांचा गजबजाट दिसून येत आहे. रविवारी मॉन्सूनपूर्व विकेंडला तर हा बंधारा पर्यटकांच्या गर्दीने फुलला होता. पर्यटकांसह गोमंतकीयांनीही विकेंडची मजा लुटताना बंधाऱ्यातील शीतल पाण्याचा गारवा अनुभवला.

मोसमी पाऊस सक्रिय होईपर्यंत तरी या बंधाऱ्यावर पर्यटकांचा वावर कायम असणार, अशी चिन्हे दिसू लागली आहेत.

गेल्या दहा-बारा वर्षांपासून प्रकाशझोतात आलेला आणि उन्हाळी पर्यटनासाठी प्रसिद्ध असलेला शापोरा नदीवरील साळ बंधारा काही काळापूर्वी गैरप्रकारांमुळे वादाचा विषय बनला होता. या बंधाऱ्यावरील या गैरप्रकारांवर नियंत्रणही ठेवण्यात आले होते. मात्र, साळ येथील या बंधाऱ्यावर पुन्हा एकदा पर्यटकांचा गजबजाट जाणवू लागला आहे.

‘कोविड’नंतर पर्यटकांत वाढ

यंदा हवामानात कमालीचा बदल होतानाच उष्णतेने कहर केला आहे. त्यामुळे गेल्या काही दिवसांपासून पर्यटकांची पावले या बंधाऱ्याकडे वळत आहेत. रविवारी तसेच सुटीच्या दिवशी तर येथे पर्यटकांची संख्या लक्षणीय असते. कोविड महामारीनंतर गेल्या वर्षीपासून पर्यटक उन्हाळी पर्यटनासाठी या बंधाऱ्यावर मोठ्या संख्येने येत आहेत.

गोमंतकीयांचीही उपस्थिती

पुढील दोन दिवसांत म्हणजेच सात जूनपासून मॉन्सूनला सुरुवात होणार असल्याचा वेधशाळेचा अंदाज आहे. पाऊस कोणत्याही क्षणी सक्रिय होण्याची शक्यता आहे. मॉन्सूनपूर्व शेवटचा रविवार अर्थातच विकेंड असल्याने आज साळ बंधारा पर्यटकांच्या गर्दीने फुलून गेला होता. दक्षिण गोव्यातील विविध भागांतून पर्यटक कुटुंबासह साळ बंधाऱ्यावर आले होते. राज्याबाहेरील पर्यटकही आले होते.