सपना सामंत

वाळपई : नगरगाव पंचायत भागातील प्रसिद्ध ब्रम्हा करमळी धबधब्यावर पर्यटक मोठ्या प्रमाणात धुडगूस घालत असून त्यांना तत्काळ प्रशासनाने आळा घालण्याची गरज आहे.असंख्य पर्यटक रविवार आणि सुट्टीच्या दिवशी ह्या धबधब्यावर येत असतात.

धबधब्यावर येणाऱ्या पर्यटकांपैकी काहीजण मोठ्या प्रमाणात प्लास्टिक तसेच दारू आणि बियरच्या बाटल्या घेऊन येतात. त्याचबरोबर कर्कश आवाजातील साऊंड सिस्टिमदेखील त्यांच्या बरोबर असते. जंगलातील या धबधब्याच्या बाजूला येऊन पर्यटक जोरजोरात संगीव वाजवून नृत्याचा ठेका धरतात. तसंच चिकन मटणावर ताव मारतात आणि कचरा मात्र धबधब्याशेजारी टाकून निघून जातात.

सध्या धबधब्याच्या आजूबाजूला पर्यटकांनी मोठ्या प्रमाणावर कचरा टाकलेला दिसून येत आहे. यामुळे पर्यावरणास तसेच जंगलातील जनावरांना हानी पोहोचू शकते. याबाबत प्रशासनाने तात्काळ दखल घेण्याची गरज आहे. प्रशासनाने कोणतीही कारवाई न केल्यास गावातील नागरिक पुढे येऊन योग्य ती कृती करतील, असा इशारा स्थानिकांकडून देण्यात आला आहे.