वेळसाव येथील ‘त्या’ मगरीला पकडण्यास अखेर वन विभागाला यश आले. मगर वन विभागाच्या पिंजऱ्यात सापडल्याने येथील नागरिकांनी समाधान व्यक्त केले.

वेळसाव येथे तळेवजा शेतात गुरुवारी मगरीचे दर्शन झाल्याने येथील नागरिकांत तसेच शेतकऱ्यांत भीतीचे वातावरण पसरले होते. मगरीला पकडण्यासाठी वन विभागाला कळविले. नंतर वन विभागाच्या पथकाने त्या शेतवजा तळ्याच्या मध्यभागी पिंजरा लावला.

दरम्यान, शुक्रवारी (ता.२८) सकाळी गावकऱ्यांनी तेथे येऊन बघितले असता मगर त्या पिंजऱ्यात कैद झालेली दिसली. याची माहिती वन विभागाचे अधिकारी व कर्मचाऱ्यांना देण्यात आली व त्यांनी मगर कैद झालेला पिंजरा वर आणला. याची माहिती आमदार आतोन वाझ यांना मिळताच त्यांनी घटनास्थळी येऊन वन विभागाचे अधिकारी व कर्मचारी यांचे आभार व्यक्त केले.