Porvorim Drug Case: पणजी, गुन्हा अन्वेषण विभागाच्या गुन्हे शाखेने काल मध्यरात्रीनंतर पर्वरी येथील ‘जीसीए’ मैदानाजवळ नायजेरियन फेर्दिनांद उडोजी ओकोक्वो (४९) याला १० ग्रॅम कोकेन व १८.८४ ग्रॅम एमडीएमए पावडरसह अटक केली.

आंतरराष्ट्रीय बाजारपेठेत त्याची किंमत २.५ लाख रुपये असल्याची माहिती पोलिस निरीक्षक दत्ताराम राऊत यांनी दिली. संशयिताची पोलिस कोठडीत रवानगी केली आहे.

पर्वरी परिसरात रात्रीच्यावेळी ड्रग्ज विक्रीसाठी काही नागरिक संशयास्पद फिरत असल्याची माहिती मिळाली होती.

त्यामुळे काल रात्रीपासूनच या भागात पोलिस पथकाने गस्त सुरू केली होती. जीसीए मैदानाजवळ एक नायजेरियन संशयास्पद ग्राहकाची वाट पाहत असल्याची उभा असल्याचे दिसले. तो बराच वेळ तेथेच होता.

त्यामुळे त्याची झडती घेण्यात आली तेव्हा त्याच्याजवळ असलेल्या पिशवीत कोकेन व एमडीएमए पावडर सापडली.

त्याच्याकडे असलेले ४ हजार रुपये व मोबाईल फोनही जप्त करण्यात आला. याप्रकरणी त्याच्याविरुद्ध अंमलीपदार्थ प्रतिबंधक कायद्याखाली गुन्हा दाखल करण्यात आला आहे.