Ponda News : फोंडा, गोमंतक बालशिक्षण परिषदेच्या तर्फे आंतरराष्ट्रीय शिक्षण दिन निमित्त एक शिक्षक-पालक मेळावा फोंड्यात आयोजित करण्यात आला होता.

हा मेळावा परिषदेच्या खडपाबांध येथील सभागृहात (गोवर्धन इमारत, एलआयसी - दुसरा मजला) दुपारी ४ ते ५.३० या वेळेत झाला. यावेळी गोमंतक बाल शिक्षण परिषदेचे अध्यक्ष डॉ. नारायण देसाई यांनी स्वागत केले.

यावेळी त्यांनी संयुक्त राष्ट्र संघटनेने २०१८ साली २४ जानेवारी हा आंतरराष्ट्रीय शिक्षण दिवस म्हणून घोषित केल्यानंतर २०१९ पासून जगातील विविध देशांत त्या दिवशी जागृती साठी कार्यक्रम होतात.

मूलभूत, विनामूल्य व दर्जेदार शिक्षण हा प्रत्येक बालकाचा व व्यक्तीचा अधिकार असून तोच अनेक सामाजिक समस्यांवरील उपायही आहे, हे सांगितले.

यावेळी चर्चासत्राचा विषय शाश्वत शांतीसाठी शिक्षण हा होता. विषयांचे महत्त्व लक्षात घेऊन सर्वांच्या सहभागातून जीवनोपयोगी, गुणवत्तापूर्ण शिक्षणासाठी संघटित प्रयत्नांसाठी आजचे चर्चासत्र आयोजित करण्यात आले होते. यासाठी शिक्षण संस्था प्रमुख पालक-शिक्षक तसेच, शिक्षक अभ्यासार्थी ,मुख्याध्यापक यांनी मोठ्या संख्येने या मेळाव्याला उपस्थिती लावली.