पेडणे: कोरगाव ग्रामपंचायतीच्या रिक्त असलेल्या सरपंचपदाची निवड करण्यासाठी तारीख देऊन ती परत परत पुढे ढकलण्याचे राजकारण पेडणेचे आमदार प्रवीण आर्लेकर हे करत असून त्यांनी लोकशाहीची केलेली थट्टा आता बंद करावी.

आता नव्याने दिलेली ७ जुलै ही तारीख रद्द केल्यास आम्ही रस्त्यावर उतरून आंदोलन करू, असा इशारा कोरगावचे उपसरपंच दिवाकर जाधव यांनी मंगळवार, १७ रोजी पंचसदस्यांसोबत घेतलेल्या पत्रकार परिषदेत दिला.

या पत्रकार परिषदेला पंचसदस्य कल्पिता कलशावकर, अनुराधा कोरगावकर, नीता नर्से व अब्दुल नाईक उपस्थित होते. दरम्यान, मी सरपंचपदाचा राजीनामा दिला. त्यानंतर सरपंच निवडीसाठी दोनवेळा दिलेल्या तारखा बदलण्यात आल्या. आता नव्याने दिलेली तारीख बदलल्यास आम्ही आंदोलन करू, असे पंच अब्दुल नाईक यांनी सांगितले.

पंचसदस्य अनुराधा कोरगावकर म्हणाल्या की, सरपंच नसल्याने अनेक कामे अडून राहिलेले आहेत. आम्ही सर्व पंचसदस्य हे स्वबळावर निवडून आलेले आहोत आणि आम्ही सर्व भाजपमध्ये आहोत. असे असताना आम्हाला अशाप्रकारची वागणूक का मिळते हे समजलेले नाही. यापुढील दिलेली तारीख रद्द करण्यात आल्यास आम्हाला तीव्र आंदोलनाशिवाय दुसरा पर्याय नाही.