फोंडा : गोवा मुक्ती संग्रामासाठी हालअपेष्टा सोसलेल्या आणि प्रसंगी प्राणार्पण केलेल्या स्वातंत्र्यसैनिकांच्या मुक्तिलढ्यातील कार्याचा इतिहास आजच्या युवा पिढीपर्यंत पोचला पाहिजे. देशभक्तीचे हे स्फुर्लिग चेतवण्यासाठी स्वातंत्र्यसैनिकांची गाथा बाल आणि युवा पिढीच्या मनावर कोरणे आवश्यक असल्याचे मत कृषिमंत्री रवी नाईक यांनी व्यक्त केले.

फोंड्यात काल शनिवारी क्रांती मैदानावर आयोजित क्रांतिदिन सोहळ्यावेळी रवी नाईक बोलत होते.

या क्रांतिदिन सोहळ्यावेळी नाईक यांच्या समवेत कला संस्कृती मंत्री गोविंद गावडे उपस्थित होते. इतर मान्यवरांत ज्येष्ठ स्वातंत्र्यसैनिक रोहिदास नाईक, फोंड्याचे नगराध्यक्ष रितेश नाईक इतर नगरसेवक तसेच अतिरिक्त उपजिल्हाधिकारी विकास गावणेकर, उपजिल्हाधिकारी प्रदीप नाईक, पोलिस उप अधीक्षक सी. एल. पाटील तसेच लष्कराचे अधिकारी, नागरिक व विद्यार्थी उपस्थित होते.

रवी नाईक व गोविंद गावडे व इतरांनी हुतात्मा स्मारकाला पुष्पांजली अर्पण केली. रवी नाईक यांनी यावेळी मानवंदना स्विकारली.

पुढे बोलताना रवी नाईक यांनी पंतप्रधान नरेंद्र मोदी यांच्यामुळे देश प्रगतीपथावर असून सर्व जाती धर्मांना बरोबर घेऊन वाटचाल करण्याची गरज व्यक्त केली.

दरम्यान क्रांती मैदानाचा लष्कराच्या ताब्यात असलेला अर्धा भाग सोडवण्यासाठी प्रयत्न करू अशी ग्वाहीही रवी नाईक यांनी दिली. यावेळी विविध विद्यालयातील विद्यार्थ्यानी सुरेख देशभक्तीपर गीते सादर केली. सूत्रसंचालन गिरिश वेळगेकर यांनी केले.