काणकोण : पोळे तपासणी नाक्यावर काँग्रेस कार्यकर्त्यांनी कर्नाटकमधून येणारी वाहनं अडवल्याने काहीकाळ तणाव पाहायला मिळाला. कर्नाटकच्या माजाळी तपासणी नाक्यावर आरटीपीसीआर निगेटिव्ह दाखला सक्तीचा केल्याच्या निषेधार्थ काँग्रेसने आंदोलन केलं

कर्नाटकमध्ये (Karnataka) गोव्यातून प्रवेश करणाऱ्या वाहनांना आरटीपीसीआर सक्तीची करण्यात आली आहे. ज्यांच्याकडे चाचणीचा निगेटिव्ह अहवाल नसतो, अशा प्रवाशांना कर्नाटकमध्ये प्रवेश करण्यापासून मज्जाव करण्यात येतो. त्यामुळे अनेक प्रवाशांना ताटकळट सीमेवरच थांबावे लागते किंवा तसंच परतावे लागते. याच्या निषेधार्थ काँग्रेसने काणकोणजवळील पोळे तपासणी नाक्यावर कर्नाटकमधून येणारी वाहने रोखली.

काँग्रेसच्या (Congress) आक्रमक भूमिकेमुळे पोळे तपासणी नाक्यावर काहीकाळ तणावाचे वातावरण पाहायला मिळालं. दरम्यान गोव्यातून कर्नाटकमध्ये जाणाऱ्या वाहनांच्या लांबच लांब रांगा लागत असल्याचं चित्र आहे. कर्नाटक सरकारच्या नियमांमुळे सर्वसामान्य प्रवाशांना मनस्ताप होत असल्याचा आरोप होत आहे. पोळे तपासणी नाक्यावर वाहने अडवून आरटीपीसीआर (RTPCR) निगेटिव्ह दाखला नसलेल्यांना राज्यात प्रवेश करण्यास मज्जाव केला.