गोव्यात आठ काँग्रेस आमदारांनी बंड केल्यानंतर 2/3 पक्ष भाजपमध्ये विलीन करण्यात आला. विधानसभेत केवळ अकरा आमदार निवडून आलेल्या काँग्रेसमध्ये या बंडानंतर केवळ तीन आमदार उरले आहेत. यामध्ये हळदोणाचे आमदार कार्लुस फरेरा, कुंक्कळीचे आमदार युरी आलेमाव आणि केपेंचे आमदार अल्टोन डिकॉस्टा हे आमदार आहेत. मागील काही दिवसांपासून काँग्रेसमधील आमदार बंडाच्या तयारीत होते, अखेर बुधवारी दिगबंर कामत, मायकल लोबो यांच्यासह आठ आमदारांनी भाजपमध्ये आसरा घेतला.

एवढ्या मोठ्या प्रमाणावर काँग्रेसमध्ये बंडखोरी झाल्यानंतर गोव्यात उरलेल्या तीन आमदरांचे काँग्रेसमधून कौतुक केले जात आहेत. काँग्रेसचे जेष्ठ नेते आणि माजी अर्थमंत्री पी. चिदंमबरम (P. Chidambaram) यांनी आमदार कार्लुस फरेरा, युरी आलेमाव आणि अल्टोन डिकॉस्टा यांचे अभिनंदन करत शुभेच्छा संदेश दिला आहे.

"कार्लुस फरेरा, युरी आलेमाव आणि अल्टोन डिकॉस्टा हे सर्व आमदारांमध्ये उंच आणि अभिमानास्पद आहेत. या आमदारांची देव, पक्ष, मतदार आणि त्यांच्या तत्त्वांप्रती असलेल्या अखंड निष्ठेला मी सलाम करतो. देव आणि गोव्याच्या जनता त्यांना आशीर्वाद देवो." असा संदेश पी. चिंदमबरम यांनी आपल्या अधिकृत ट्विटर अकाउंटवर लिहला आहे.

आमदार युरी आलेमाव यांनी पी. चिदंमबरम यांनी दिलेल्या कौतुक संदेशाबद्दल त्यांचे आभार मानले आहेत.