Goa News: फोंड्यात काही ठिकाणी पन्नास रुपयांची बनावट नोट फिरत असल्याचा संशय काही दिवसांपासून येथील व्यापाऱ्यांना यायला लागला होता, तो संशय खरा ठरला रामनाथी - साकवार येथील एका दुकानदाराला ही पन्नास रुपयांची बनावट नोट सापडल्यानंतर.

कालच रामनाथी साकवार येथील या दुकानदाराकडे एका मजुराने संध्याकाळच्या वेळेला काही चाळीस रुपयांच्या सामानाची खरेदी केली आणि गडबडीत पन्नास रुपयांची नोट दिली.

इतर गिऱ्हाईक असल्याने व्यापारीही गडबडीत होता, त्यामुळे त्याने दहा रुपये काढून त्या ग्राहकाला दिले आणि पन्नासची नोट गल्ल्यात टाकली. बऱ्याच वेळानंतर व्यापाऱ्याने गल्ल्यातील ती नोट पाहिली असता त्याला धक्काच बसला.

ही पन्नासची नोट चक्क बनावट असून कागद आणि छपाईही खऱ्या नोटप्रमाणे आहे, फक्त त्यावरील अक्षरे ही मुलांच्या खेळासाठी वापरतात, तशा नोटसारखी आहे. शेवटी काय, त्या व्यापाऱ्याला डोक्याला हात लावायची पाळी आली.