कोमुनिदादच्या दक्षिण गोवा विभागाचे प्रशासक प्रदीप नाईक यांना आज कर्तव्यात कसूर केल्याबद्दल निलंबित करण्यात आले. दक्षता खात्याचे संचालक दीपक बांदेकर यांनी हा आदेश जारी केला.

फातोर्ड्याचे आमदार विजय सरदेसाई व बाणावलीचे आमदार वेन्झी व्हिएगस यांनी केलेल्या आरोपांत तथ्य असेल तर त्यांना निलंबित करा,असा आदेश मुख्यमंत्री डॉ. प्रमोद सावंत यांनी गुरुवारी विधानसभेत दिला होता. कामाकडे दुर्लक्ष केल्याचा ठपका नाईक यांच्यावर ठेवण्यात आला आहे.

दक्षिण गोवा कोमुनिदाद प्रशासकांबाबत अनेक तक्रारी आलेल्या आहेत. ते कामावर हजर राहत नाहीत. कामाकडे दुर्लक्ष करतात. त्यामुळे फाईल पुढे जात नाही. मुंगुल येथील कोमुनिदाद जमिनीवरील बेकायदेशीर घर पाडण्याचे आदेश असूनही त्या घरावर कारवाई होत नाही, अशा स्वरुपाच्या तक्रारी नागरिकांकडून येत आहेत. त्यामुळे त्यांच्यावर तत्काळ कारवाई करण्यात यावी, अशी मागणी विधानसभेत करण्यात आली होती.