पणजी: ड्रग्जप्रकरणी अटक केलेला कुप्रसिद्ध ड्रग्ज माफिया यानिव बेनाईम ऊर्फ अटाला याला भाडेपट्टीवर फ्लॅट दिलेल्या मालकाविरुद्ध अमलीपदार्थविरोधी कक्षाच्या पोलिसांनी हणजूण पोलिसांत तक्रार दाखल केली आहे.

भाडेकरू ठेवलेल्या व्यक्तीची माहिती सी फॉर्म भरून जवळच्या पोलिस स्थानकात देणे सक्तीचे असताना ती फ्लॅटच्या मालकाने दिली नव्हती. गेल्या नऊ महिन्यापासून संशयित अटाला तेथे राहत असताना ही माहिती लपवण्यात आल्याचा ठपका या मालकावर ठेवण्यात आला आहे, अशी माहिती पोलिस सूत्राने दिली.

दरम्यान, संशयित अटाला याला पाच दिवसांची पोलिस कोठडी संपल्यानंतर दोन दिवस कोठडी न्यायालयाने वाढवून दिली होती. ही कोठडी आज संपल्याने पुन्हा ती वाढवून घेण्यासाठी त्याला उद्या ११ रोजी सकाळी म्हापसा येथील न्यायालयात उभे करण्यात येणार आहे.

गोव्यात वास्तव्य करणाऱ्या या संशयित अटालाचा उत्पन्नाचा स्रोत काय आहे याचा तपास पोलिस करत आहे. गोव्यात येण्यापूर्वी त्याला उत्तराखंड पोलिसांनी बेकायदेशीर वास्तव्यप्रकरणी अटक केली होती. गोव्यात त्याच्याविरुद्ध खुनाचा प्रयत्न केल्याप्रकरणी गुन्हा दाखल केला आहे, त्यामुळे त्याला गोव्यात आणण्यात आले होते.

त्याला जामीन मिळाल्यानंतर अनेक महिने गोव्यात असल्याची माहिती पोलिसांनाही माहिती नव्हती. फ्लॅट मालकाने संशयित अटला याला लपून राहण्यास मदत केल्याची चौकशी हणजूण पोलिस गुन्हा दाखल झाल्यानंतर करणार आहेत.