Subhash Shirodkar: एकमेकांना सहकार्य करणे हे सहकार क्षेत्राचा गाभा आहे. सहकार क्षेत्राचा लाभ बहुतांश सर्वसामान्यांना व्हावा या हेतूने सहकार क्षेत्राने काम करावे आणि आपला विस्तार वाढवावा. आज सहकार क्षेत्रातील बँकांचे व्याज दर 10 टक्क्यांपेक्षा जास्त आहे.

जर हे व्याज दर 10 टक्क्यांपेक्षा कमी केल्यास त्याचा फायदा सर्वसामान्य लोकांना होईल त्यामुळे त्यावर विचार व्हावा, असे आवाहन सहकारमंत्री सुभाष शिरोडकर यांनी केले.

केरी-सत्तरी येथे सत्तरी तालुका चवथे सहकार संमेलन पार पाडले. त्यावेळी उद्‌घाटन कार्यक्रमात बोलताना सुभाष शिरोडकर यांनी वरील आवाहन केले.

यावेळी व्यासपीठावर स्थानिक आमदार डॉ. दिव्या राणे, केरीच्या सरपंचा दीक्षा गावस, केरी अर्बन सहकारी बँकेचे अध्यक्ष चंद्रकांत पिसुर्लेकर, स्थायी समितीचे अध्यक्ष पांडुरंग गावस, सहकार संमेलन आयोजन समितीचे अध्यक्ष विष्णू पारोडकर, सचिव अनुराधा म्हाळशेकर, पाणी वाटप संस्थचे अध्यक्ष नकुळ राणे, सदस्य नामदेव केरकर, राजू गावस आदी मान्यवर उपस्थित होते.

केरी युथ क्लब येथे सत्तरी सहकार संमेलन समिती आणि केरी अर्बन सहकारी सोसायटी यांच्या संयुक्त विद्यमाने हे संमेलन पार पडले. सूत्रसंचालन लक्ष्मण गावस तर आभार अनुराधा म्हाळशेकर यांनी केले.

तरुणांनी सक्रिय व्हावे!

आज गोव्यासारख्या राज्याला बाहेरील राज्यातून दूध, भाजीपालासारख्या बऱ्याच वस्तू आणाव्या लागतात. अशा वस्तूंचे उत्पादन जर मोठ्या प्रमाणात गोव्यात झाले तर उत्पादन वाढेल व त्याचा मोठा फायदा गोव्याला होईल. सहकार क्षेत्रातून याचा लाभ घेता येईल तेव्हा गोव्यातील तरुणांनी सहकार क्षेत्रातून याचा फायदा घ्यावा.

यातून रोजगाराच्या संधी उपलब्ध होतील, तेव्हा त्याचा लाभ घेण्यासाठी तरुणांनी पुढे यावे, सक्रिय सहभागी व्हावे, असे मत डॉ. दिव्या राणे यांनी केले. यावेळी मेळावली येथील आनंद मेळेकर यांनी राबवलेल्या मध उत्पादन व्यवसायाबद्दल माहिती दिली.