म्हापसा: गेल्या अनेक दिवसांपासून गोव्यातील रस्त्यांची दुरवस्था चर्चेचा विषय बनली आहे. रस्त्यांवरील खड्डे आणि धो-धो कोसळणाऱ्या पावसामुळे राज्यात विविध ठिकाणी अपघात घडत असून, अनेकांचा जीव धोक्यात येत आहे. अशाच एका दुर्दैवी घटनेत, सोमवारी (दि. २९) म्हापसा-पेडणे महामार्गावरील महाखाजन येथे एका विचित्र अपघातामुळे अनेक वाहनांचे नुकसान झाले आहे.

एकामागे एक चार गाड्यांची धडक

कोलवाळमधील महाखाजन परिसरात रस्त्याच्या खराब अवस्थेमुळे एका बाईकस्वाराचा अपघात झाला. बाईक घसरून तो खाली पडल्याने जखमी झाला. त्याला वाचवण्यासाठी मागून येणाऱ्या वाहनांनी अचानक ब्रेक लावले, त्यामुळे एकामागे एक चार वाहनांची विचित्र धडक झाली. या अपघातामुळे महामार्गावर काही काळ वाहतूक विस्कळीत झाली होती.

जखमी रुग्णालयात, पोलिसांचा पंचनामा सुरू

अपघातात जखमी झालेल्या बाईकस्वाराला तातडीने उपचारासाठी रुग्णालयात दाखल करण्यात आले आहे. घटनेची माहिती मिळताच कोलवाळ पोलीस कर्मचारी तात्काळ घटनास्थळी दाखल झाले. त्यांनी अपघाताचा पंचनामा सुरू केला असून, या प्रकरणाचा पुढील तपास सुरू आहे. रस्त्यांच्या दुरवस्थेमुळे होणाऱ्या अपघातांवर तातडीने तोडगा काढण्याची मागणी आता पुन्हा एकदा जोर धरू लागली आहे.