कर्नाटक येथील मंगळुरू आणि केरळ मधील कोची विद्यापीठात (universities of Cochin and Mangalore) आता कोंकणी भाषेचे धडे दिले जाणार आहेत. या दोन्ही विद्यापीठात कोंकणी भाषेची तोंडओळख करून देण्यासंबधित अभ्यासक्रम सुरू केला जाणार आहे. अशी माहिती गोव्याचे राज्यपाल पी.एस श्रीधरन पिल्लई (Governor P S Shreedharan Pillai) यांनी दिली आहे. दोन्ही विद्यापीठांनी राज्यपालांचा प्रस्ताव मान्य केला असल्याचे पिल्लई म्हणाले.

कोंकणी ही एक भारतातील सुंदर अशी प्राचीन भाषा आहे. ही भाषा केवळ गोव्यात नव्हे तर, कर्नाटक आणि महाराष्ट्रात देखील बोलली जाते. तसेच, केरळ मधील जवळपास दोन लाख लोक कोंकणी भाषा बोलतात. गोवा विद्यापीठाचे कुलपती या नात्याने मी मंगळुरू आणि कोची विद्यापीठांना कोंकणी भाषेचा अभ्यासक्रम सुरू करण्याची विनंती केली आणि त्यांनी हा प्रस्ताव मान्य केला आहे. अशी माहिती राज्यपाल पिल्लई यांनी दिली आहे. कुडचडे (Curchorem) येथील एका शाळेत राज्यपाल बोलत होते.

राज्यपालांनी यावेळी झेव्हियर शिक्षण संस्थेचे राज्यात शिक्षण प्रसार करण्यासंबधित प्रयत्नांचे कौतुक केले. ख्रिस्ती मिशनरीजने शिक्षण क्षेत्रात मोठे योगदान दिले असल्याचे उद्गागार यावेळी राज्यपालांनी काढले. मिशनरीजने जवळपास 80 डिक्शनरी तयार केल्या आहेत. याशिवाय माझी मातृभाषा असलेल्या मल्याळी भाषेचे शब्दकोश देखील तयार केल्याचे राज्यपाल पिल्लई म्हणाले. यावेळी सार्वजनिक बांधकाममंत्री निलेश काब्राल उपस्थित होते.