इंडियन इन्स्टिट्यूट ऑफ टेक्नॉलॉजी,बॉम्बेने वास्को शहरातील प्रदूषणाला कारणीभूत असलेल्या घटकांचा अभ्यास करून एक अहवाल बनवला आहे. हा अहवाल गोवा राज्य प्रदूषण नियंत्रण मंडळाने स्वीकारला आहे. या अहवालामध्ये म्हटले आहे की, वास्को (Vasco) शहरात कोळसा हा वायू प्रदूषणाचा (Air Pollution) एकमेव मुख्य स्त्रोत नाही.

या अहवालामध्ये नमूद केले आहे की, कार्बन कणांसह, वाहनांचा धूर , बंदर-संबंधित कामे, बायोमास, घनकचरा जाळणे आणि रस्त्यावरील धूळ (Dust) या सर्व गोष्टी वास्कोमधील वायू प्रदूषणासाठी कारणीभूत आहेत. यामध्ये कोळशाचे योगदान सुमारे 20 ते 30 टक्के आहे.

इंडियन इन्स्टिट्यूट ऑफ टेक्नॉलॉजी (IIT), बॉम्बे येथील पर्यावरण (Environment) विज्ञान आणि अभियांत्रिकी विभागाच्या वायु प्रदूषण संशोधन प्रयोगशाळेच्या 11 सदस्यीय टीमने हा अहवाल प्रोफेसर वीरेंद्र सेठी यांच्या नेतृत्वाखाली तयार केला आहे.