राज्यातल्या पर्यटन वाढी खातीर क्रुझ टर्मिनलाक प्रोत्साहन

राज्यातल्या पर्यटन वाढी खातीर क्रुझ टर्मिनलाक प्रोत्साहन दितलें आनी ते खातीर केन्द्र सरकारा कडल्यान मदत मेळटली अशी आशा मुख्यमंत्री दोतोर प्रमोद सावंतान व्यक्त केल्या. मुख्यमंत्र्यान केन्द्रीय जहाज, बंदर उदका मार्ग आनी आयुश-मंत्री सर्वानंद सोनोवाल हांची भेट घेवन वेगवेगळ्या विशयांचेर चर्चा केल्या उपरांत मुख्यमंत्र्यान ही म्हायती दिली. हे विशीं आनी म्हायती दितना केन्द्रीय जहाज, बंदर जल मार्ग आनी आयुश मंत्री सोनेवाल हांचेकडेन वेगवेगळ्या विशयांचेर जाल्ली चर्चा फायद्याची थारली अशें मुख्यमंत्र्यान म्हटलें. राज्यांत जहाज, बंदर आनी उदकामार्ग मंत्रालया कडेन संबंदीत वेगवेगळी कामां सुरू आसात. हांतूतल्या सागरमाला वरवी येवपी कामांकूय प्रोत्साहन दिवन पणजी आनी वास्को हांगा क्रूझ टर्मिनल उबारपाखातीर यत्न करतलें अशेंय मुख्यमंत्र्यान सांगलें.

केंद्र सरकारान खनीज निर्यात शुल्क 30 टक्क्या वयल्यान केल्या 50 टक्के

केंद्र सरकारान खनीज निर्यात शुल्क 30% वयल्यान 50% केल्या. देखून आतां गोंयांतल्यो खणी बेगीन सुरू जावपाची शक्यताय कमी आसा. सर्वोच्च न्यायालयान कर्नाटकांतल्या खनीज वेवसायाक थाकाय दितना उण्या ग्रेडीचो खनीज म्हाल विकपा खातीर मान्यताय दिल्ली. तेच धरतरेर गोंया खातीरूय थाकाय मेळोवपा खातीर खण उद्देगाचे यत्न सुरू आशिल्ले. पूण केंद्र सरकारान खनिजा वयल्या निर्यात करांत व्हडा प्रमाणांत वाड केल्ल्यान गोंया सयत देशांतल्या खण उद्देगाक मोटो धक्को बसला. खणी बेगीन सुरू करून राज्याक व्हड महसूल मेळटलो ह्या हेतान गोंय सरकारान आपले खनीज विकास म्हामंडळ स्थापन केल्लें. पूण, निर्यात करप जर 50 टक्के केलो जाल्यार राज्य सरकाराकूय हो वेवसाय करप परवडपाचें ना. गोंयांतलो खूबश्यों खनीज म्हाल उण्या ग्रेडीचो आसा. देखून देशांत ताका व्हडलीशी मागणी नासता. हांगा स्टील कंपनींकूय ह्या म्हालाचेर प्रक्रिया करपाक परवडना. आनी ताका लागून मीन निर्यात करपाचेर भर दितात. पूण केंद्राचो हो निर्णय गोंयांतल्या उद्देजकांक खण वेवसाय बंदूच करपाक भाग पडटलो, अशें दिसपाक लागला.

कोलें स्टेशनाकडेन कोळसो व्हरपी रेल्वे रुळवयल्यान देंवली

वास्को कर्नाटका मार्गावयल्या कोलें स्टेशनाकडेन कोळसो व्हरपी रेल्वे, सांजेच्या सुमार 6 वरांचेर रुळवयल्यान देंवली. ह्या गाडयेचें सुमार 4 कंटेनर रुळावयल्यान देंवलें. ह्या रुळाचें काम चालू आशिल्ल्याची म्हायती मेळ्ळ्या देखून कोलें दुधसागर रेल्वे रुळ कांय तेंपाखातीर बंद दवरतलें आनी ह्या कामाक लागून ह्या रुळावयल्यान वचपी गाडयांचें वेळापत्रक बदल्लां अशें रेल्वे अधिकाऱ्यांनी कळीत केल्लें. मात ह्या रुळाचें काम पुराय जाल्ल्यान हो रुळ कार्यात्मक जाल्ल्याचेंय कळीत केलां.

भौशिक बांदकाम खात्यांत अभियंतो जर लाच घेतां जाल्यार म्हाका सांगात : काब्राल

भौशिक बांदकाम खात्यांत वरिश्ठ कनिश्ठ खंयचोय अभियंतो जर लाच घेतां जाल्यार सरळ म्हाका सांगात अशें आवाहन भौशिक बांदकाम मंत्री निलेश काब्राल हांणी कंत्राटदारांक केलां. भौशिक बांदकाम खात्यांत सगल्या प्रकारची कांमा पुराय करून घेवपाखातीर कंत्राटदारां कडल्यान व्हडा प्रामाणांत लाच मागतात असो आरोप आसा. ह्या आरोपाक लागून काब्राल हांणी हे आवाहन केले. अशा प्रकारची लाच कोणीय मागता जाल्यार सरळ म्हाका सांगचें अशें तांणी म्हटलें. भौशीक बांदकाम खात्यांत येता त्या वर्स भरांत व्हडा प्रमाण वरिश्ठ श्रेणीतलें अभियंतें निवृत्त जाता, त्या जाग्यार नव्या आभियंत्यांक बढती मेळप गरजेचें आसा. ह्या खात्याचें काम व्हड आसा. देखून आर्थिक निधीची व्हडा प्रमाणांत गरज पडटा देखून हे विशीं आपूण मुख्यमंत्र्या कडेन लेगीत उलयला अशी म्हायती भौशीक बांदकाम मंत्री निलेश काब्राल हांणी दिली.

आमठाणे धरणांतल्या उदकाची पातळी सद्या उणी जाल्या

दिवचल म्हालांतल्या आमठाणे धरणांतल्या उदकाची पातळी सद्या उणी जाल्या. सध्या ह्या धरणांत साडे पंचेचाळीस मीटर इतको उदकाचो साठो आसा. फाटल्या म्हयन्यात 47 (सत्तेचाळीस) मीटर इतकी धरणांतल्या उदकाची पातळी आशिल्ली. साळ बांदातल्यान ह्या धरणांत उदक सोडप सद्या बंद केला. देखून उदक कमी जाला. मॉन्सून सुरु जाय मेरेन धरणांतल्या उदकाचेर कांयच परिणाम जावचो ना. असो उदका-स्रोत खात्याचो दावो आसा.