CM Pramod Sawant Hello Goenkar Programme: मुख्यमंत्री डॉ. प्रमोद सावंत यांच्या हॅलो गोंयकार या कार्यक्रमात एका कॉलरने फोनवरून उंडिर येथील एसटीपी प्रकल्पाबाबत प्रश्न उपस्थित केला. गेले काही दिवस हा प्रश्न चर्चेत आला आहे. त्याबाबत बोलताना मुख्यमंत्री सावंत यांनी हा प्रकल्प गरजेचा असून खूप काळापासून प्रलंबित असल्याचे सांगितले.

मुख्यमंत्री सावंत म्हणाले की, उंडिर येथील एसटीपी प्रकल्प हा मूळचा आमच्या आधीच्या सरकारने आणलेला प्रकल्प आहे. तथापि, तो प्रकल्प गरजेचा आहे. त्याच्या सर्व परवानग्या मंजूर झालेल्या आहेत. हा एक प्रलंबित प्रकल्प आहे. तो पूर्ण करणे गरजेचे आहे. किंबहुना तो गरजेचा आहे.

याबाबत काही अडचणी असतील तर त्याबाबत स्थानिकांशी चर्चा, सुसंवादातून मार्ग काढला जाईल. स्थानिकांनी याबाबत भेट घ्यावी. हा मुद्दा निकाली काढली जाईल.

गेल्या काही दिवसांपासून उंडिर येथील ग्रामस्थ या प्रकल्पाविरोधात रस्त्यावर उतरत आहेत. दरम्यान, रविवारी ३ सप्टेंबर रोजी या प्रकल्पाला विरोधासाठी बैठकीचे आयोजन करण्यात आले आहे. तसेच या प्रकल्पाविरोधात सुप्रीम कोर्टात जायची गरज पडल्यास जाऊ, असा निर्धार ग्रामस्थांनी व्यक्त केला आहे.

दरम्यान, मंत्री सुदिन ढवळीकर यांनी हा प्रकल्प पूर्ण केला जाणार आहे, असे ठामपणे सांगितले आहे. तसेच या प्रकल्पाला विरोध करणाऱ्यांपैकी काही जणच गोव्याचे आहेत, बाकीचे बाहेरचे आहेत, अशी टीका त्यांनी केली होती. या आंदोलनावरून त्यांनी रिव्होल्युशनरी गोवन्स पक्षावरही टीका केली होती.