खण निर्यातीचेर आशिल्लो 50 % निर्यात कर फाटीं घेवपाची विनोवणी

केन्द्रीय अर्थमंत्री निर्मला सितारामन हांका खण निर्यातीचेर आशिल्लो 50 % निर्यात कर फाटीं घेवपाची विनोवणी केल्ल्याचें मुख्यमंत्री दोतोर प्रमोद सावंतान दिल्लीत जाल्ल्या केन्द्रीय मंत्र्यांच्या बस्के उपरांत गोंयांत पावतकीच सांगलें. GSTच्या साबार प्रस्नांचेर लेगीत चर्चा जाल्ल्याचें तांणी हे वेळार सांगलें. तशेंच गोंयच्या आयुश खात्या संबंदीत आशिल्लें प्रस्नांचेर केन्द्रीय आयुश मंत्र्याकडेन चर्चा केल्ल्याचेय तांणी हे वेळार सांगलें.

आम आदमी पार्टीन गोंयातल्यान कार्यकारी समित्यो बरखास्त केल्यात

आम आदमी पार्टीन गोंयातल्यान सगळ्यो कार्यकारी समित्यो बरखास्त केल्यात. दिल्लीची आमदार आनी गोंय प्रभारी आतिशी मार्लेनान हेविशी नोटिस काडल्या. 2022च्या विधानसभा वेचणुकी उपरांत आपल्या प्रवासाच्या नव्या टप्प्या खातीर आम आदमी पक्ष तयारी करता. बेगीनूच आपाच्या नव्या समित्यांची निवड जातली. गोंय विधानसभेच्या वेचणुकीत आम आदमी पार्टीन दोन आमदार वेचून हाडल्यात.

पंचायत वेंचणूको; योग्य तो निर्णय घेतलें : पंचायत मंत्री माविन गुदिन्हो

सरकाराक वेंचणूको बेगीन जाल्ल्यो जाय, मात सर्वोच्च न्यायालयान tripple test आनी मागास वर्गीयांच्या आरक्षणां विशी निर्देश दिल्यात, हे सगलें मुद्दे हातींत घेतले आनी योग्य तो निर्णय घेतलें अशें पंचायत मंत्री माविन गुदिन्होन सांगले. तशेंच राज्य सरकाराचो सल्लो घेवन वेंचणूको घडोवन हाडप हे S.E.Cची जापसालदारकी अशेंय तांणी म्हटलें.

दयानंद समाजिक सुरक्षा येवजणेचे उरिल्ले पयशें म्हयन्याभितर दितलें

फाटल्या कांय म्हयन्यांचें दयानंद समाजिक सुरक्षा येवजणेच्या अंतर्गत मेळपी उरिल्ले पयशें ह्या म्हयन्याभितर लाभार्थ्यांक दितलें अशें समाज कल्याण मंत्री सुभाश फळदेसायान सांगलें. ह्या येवजणेचो लाभ घेवपी सुमार 1 लाख 38 (आठतीस) हजार लाभार्थी आसात अशेंय तांणी हे वेळार सांगलें. तशेंच हे पयशें लाभार्थ्यांक वेळचें वेळार मेळचें देखून यंत्रणां हाडटलें अशेंय तांणी हे वेळार सांगलें

कला अकादमीच्या कामात कसलोच मोठो बदल करूक ना

कला अकादमीच्या कामात कसलोच मोठो बदल करूक ना. जर बदल करपाक जाय आशिल्ले जाल्यार कला अकादमीची पुराय वास्तू मोडटा आशिल्ले, कला आनी संस्कृती मंत्री गोविंद गावडेन सांगलें. कला अकादमीच्या कामावेल्यान चार्ल्स कोरिया फावंडेशनान केल्ले आरोप पुरायेन चुकीचे आसात. आमी फकत नुतनीकरणाचे काम हातीन घेतला, अशें मंत्री गोविंद गावडे सांगता. अकादमीचे 10 टक्के काम पुराय जाला. कंत्राटदाराक आतामेरेन धा कोटी रुपया दिल्यात. सोमारा पत्रकारांक घेवन कला अकादमीची पळोवणी केल्या उपरांत तो उलोयतालो.