Goa Shigmo: गोव्याचे मुख्यमंत्री डॉ. प्रमोद सावंत यांनी आपल्यातील कला प्रेम जागे करताना चक्क ढोल वाजवून शिगम्याचा आनंद घेतला. शुक्रवारी रात्री डिचोलीत शासकीय शिगमोत्सव मिरवणूकीत सहभागी होताना त्यांनी ढोल वाजवून सर्वांना आश्चर्यचकीत केले. त्यांच्याबरोबर डिचोलीचे आमदार डॉ. चंद्रकांत शेट्ये यांनीही ढोलावर बडी मारली.

डिचोलीत शुक्रवारी शिगमोत्सव मिरवणूक प्रचंड उत्साहात पार पडली. साखळी येथील शिगमोत्सव मिरवणुकीत सहभागी होऊन मुख्यमंत्री डॉ. सावंत रात्री उशिरा डिचोलीत उपस्थित राहिले. डिचोलीत शिगमोत्सव मिरवणुकीत सहभागी होताना मुखमंत्र्यांनी काही क्षण ढोलाचा ठेका धरला.

बोर्डेतून मिरवणुकीला प्रारंभ

बोर्डे वडाकडून श्री वडेश्वर देवाच्या प्रांगणातून शिगमोत्सव मिरवणूकीला प्रारंभ झाला. भायली पेटमार्गे छत्रपती शिवाजी महाराज सर्कल आणि मैदानाकडून कदंब बसस्थानकावर आल्यानंतर मिरवणुकीची सांगता झाली. मिरवणुकीत सहभागी पुराणकालीन कथावर आधारीत आकर्षक चित्ररथ सर्वांचे लक्ष वेधून घेत होते.

रोमटामेळ आणि लोकनृत्यांचा अविष्कार तसेच विविध वेशभूषा केलेले कलाकार, यामुळे शिगमोत्सव मिरवणुकीचे वातावरण फुलून गेले होते. बोर्डे, भायलीपेट आदी मिरवणुकीच्या मार्गाच्या दुतर्फा लोकांनी गर्दी केली होती. रात्रीपर्यंत मिरवणुकीचा जल्लोष सुरु होता. पोलिस कायदा सुव्यवस्था आणि वाहतुकीवर नियंत्रण ठेवून होते.