पणजी-जुने गोवे बगल रस्त्यालगत बांधण्यात येणाऱ्या भाजप गोवा मुख्यालय इमारतीची पायाभरणी केंद्रीय मंत्री तथा भाजपचे राष्ट्रीय अध्यक्ष जे. पी. नड्डा यांच्या हस्ते करण्यात येणार आहे. आज (मंगळवारी) रात्री मुख्यमंत्री डॉ. प्रमोद सावंत आणि भाजप प्रदेशाध्यक्ष सदानंद शेट तानावडे यांनी नड्डा यांना यासाठीचे निमंत्रण दिले. याच महिन्यात ही पायाभरणी केली जाणार आहे.

मुख्यमंत्री आज दुपारनंतर तातडीने दिल्लीला रवाना झाले होते. आसगाव येथील आगरवाडेकर यांचे बेकायदेशीरपणे घर पाडण्याचे प्रकरण सध्या गाजत असल्याने केंद्रीय गृहमंत्रालयाकडून त्यांना चर्चेसाठी बोलावले असल्याची माहिती पसरली होती.

मात्र, मुख्यमंत्र्यांनी आपली दिल्ली भेट पूर्वनियोजित होती, असे सांगितले. ते म्हणाले, लोकसभा निवडणुकीनंतर तेव्हा राष्ट्रीय अध्यक्ष असलेल्या नड्डा यांच्याशी सविस्तर चर्चा झाली नव्हती. ती करण्यासाठी नड्डा यांची भेट घेतली. तानावडे हे संसदेचे अधिवेशन असल्याने तेही दिल्लीत होते, ते बैठकीत सहभागी झाले. शहा यांची भेट घेण्यासंदर्भात रात्री उशिरापर्यंत काही निश्चित झालेले नव्हते.

आसगाव येथील प्रदीप आगरवाडेकर यांचे घर पाडण्याच्या प्रकरणात पोलिस महासंचालक जसपाल सिंग यांच्यावर ठपका ठेवल्यानंतर महासंचालकांची बदली केली जाईल, अशी अटकळ व्यक्त केली जात आहे.

आगरवाडेकर यांचे घर जसपाल सिंग यांच्या सांगण्यावरूनच पाडण्यात आले. त्याबाबत त्यांनी आपल्याला धमकीही दिली होती, असा दावाही प्रशल नाईक देसाई यांनी केला आहे. या प्रकरणाने आतापर्यंत अनेक वळणे घेतलेली आहेत. त्यामुळे मुख्यमंत्री डॉ. सावंत दिल्लीत शहा यांना भेटतील, अशी चर्चा होती. मात्र, मंगळवारी रात्री उशिरापर्यंत त्यांची ही भेट ठरली नव्हती.