सिद्धार्थ दिलीप नाईक या एका सामान्य दिव्यांग मुलाने स्वतःच्या भविष्यासाठी सुरू ठेवलेल्या मेहनत व कष्टाची ओळख सोमवारी (ता.12) मुख्यमंत्री डॉ. प्रमोद सावंत यांनी स्वतः करून दिली.

दिव्यांगत्वावर मात करून स्वावलंबी बनण्यासाठी सिद्धार्थ करीत असलेल्या कामाची माहिती मुख्यमंत्र्यांनी रवींद्र भवन साखळीत आयोजित प्रधानमंत्री राष्ट्रीय रोजगार प्रशिक्षण मेळाव्यात करून दिली.

या मेळाव्याचे उद्‌घाटन झाल्यानंतर मुख्यमंत्री डॉ. प्रमोद सावंत यांचे युवांना मार्गदर्शन व प्रोत्साहन देणारे भाषण झाले. त्यानंतर मुख्यमंत्री सावंत यांना कार्यक्रमस्थळीच सिद्धार्थ नाईक याने गाठले व विक्रीसाठी आणलेली कोकमची आमसुले विकत घेण्याची विनंती केली. त्याच्याकडून आमसुले घेतल्यावर मुख्यमंत्र्यांनी त्याची ओळख करून दिली.

दिलखुलास कौतुक

सिद्धार्थ नाईक हा दिव्यांग असून त्याने संजय स्कूलमधून आपले शिक्षण पूर्ण केल्यानंतर चेअरमन गुरुदास पावसकर यांच्या मदतीने घरीच फाईल बनविण्याचे मशीन घातले. या कामात त्याला त्याची आई मदत करते. यातूनच तो आपला उदरनिर्वाह करत आहे, असे मुख्यमंत्री डॉ. प्रमोद सावंत यांनी उपस्थितांना सांगत सिद्धार्थच्या प्रेरणादायी कामाची माहिती दिली.